គាំទ្រឲ្យបានច្រើន U-15 កម្ពុជា ប៉ះ អូស្ត្រាលី និង សិង្ហបុរី ប៉ះ ហ្វីលីពីន ~ KAS4UAll

គាំទ្រឲ្យបានច្រើន U-15 កម្ពុជា ប៉ះ អូស្ត្រាលី និង សិង្ហបុរី ប៉ះ ហ្វីលីពីន

ក្រុមយុវជនជម្រើសជាតិកម្ពុជាអាយុក្រោម១៥ឆ្នាំ(U-15)ត្រូវប្រឈមនឹងក្រុមខ្លាំងយុវជនអូស្ត្រាលីវេលាម៉ោង៦:៣០នាទីយប់នេះ ខណៈក្រុមយុវជនសិង្ហបុរីជួបក្រុមហ្វីលីពីនវេលាម៉ោង៣:៣០នាទីរសៀលថ្ងៃនេះនៃពាន AFF U-16 Championship 2015 ។ ការប្រកួតទាំងពីរធ្វើឡើងនៅពហុកីឡដ្ឋានជាតិអូឡាំពិកដែលផ្សាយផ្ទាល់ដោយទូរទស្សន៍ BTV ទាំងពីរគូ។

ក្រុម U-15 កម្ពុជា

ការប្រកួតនេះពិតជាតឹងតែងខ្លាំងសម្រាប់ក្រុមយុវជនកម្ពុជាដែលប៉ះក្រុមខ្លាំងអូស្ត្រាលីទើបតែប្រកួតទី១។ U-15 កម្ពុជាសម្រាកបានមួយថ្ងៃមួយយប់ប៉ុណ្ណោះដើម្បីប្រមូលកម្លាំងសម្រាប់ប្រកួតថ្ងៃនេះ បន្ទាប់ពីជួបនឹងU-16 ហ្វីលីពីនដោយទទួលបានជ័យជម្នះ១-០។ ចំណែកក្រុមយុវជនអូស្ត្រាលីវិញ នេះជាការប្រកួតទីមួយរបស់ពួកគេ ដូច្នេះកម្លាំងពេញល្អ មាឌក៏ធំខ្ពស់ជាងកម្ពុជា និងគុណភាពបាល់ក៏ល្អថែមទៀត ហើយច្បាស់ណាស់ថា ពួកគេនឹងដាក់សម្ពាធខ្លាំងលើយុវជនកម្ពុជាដែលមានមាឌតូច។

ទោះជាយ៉ាងណា កត្តាដ៏សំខាន់ពីរដែលជួយធ្វើឲ្យយុវជនកម្ពុជាមានកម្លាំងចិត្តបំផុតនោះគឺជ័យជម្នះ១-០ លើក្រុមហ្វីលីពីនកាលប្រកួតលើកទីមួយបានធ្វើឲ្យពួកគេកាន់តែមានទំនុកចិត្ត និងការគាំទ្រដ៏ច្រើនពីបងប្អូនប្រជាពលរដ្ឋខ្មែរជាចំណែកដ៏សំខាន់សម្រាប់ការលើកទឹកចិត្តរបស់ពួកគេ។ ដូច្នេះទាមទារឲ្យបងប្អូនខ្មែរនាំគ្នាចូលរួមគាំទ្រ និងលើកទឹកចិត្តឲ្យបានច្រើនកុះករ។

ក្រុម U-១៦ អូស្ត្រាលី (រូបថត សហព័ន្ធបាល់ទាត់អូស្ត្រាលី ឆ្នាំ២០១៣)

លោក Iki Yusuke គ្រូបង្វឹកក្រុម U-15 កម្ពុជាបាននិយាយថា សម្រាប់ការប្រកួតជាមួយយុវជនអូស្ត្រាលីត្រូវប្រឹងប្រែងប្រកួតតាមបច្ចេកទេស ល្បិចកល និងប្រាជ្ញាស្មារតីឲ្យបានច្រើនបំផុត ពីព្រោះក្រុមអូស្ត្រាលីមានប្រៀបខាងកម្ពស់ និងល្បឿនលឿន។ លោកសង្ឃឹមថា ក្រុមរបស់លោកនឹងធ្វើបានល្អដូចពេលប្រកួតនឹងហ្វីលីពីន។

ក្រុមកម្ពុជាបានចេញទៅប្រកួតពានមិត្តភាពអន្តរជាតិមួយនៅប្រទេសជប៉ុន ប៉ុន្តែទទួលបានលទ្ធផលមិនល្អឡើយ។ ទោះយ៉ាងណាការប្រកួតនៅប្រទេសជប៉ុនជាផ្នែកមួយជួយអភិវឌ្ឍសមត្ថភាពរបស់ពួកគេ។ មិនត្រឹមតែប៉ុណ្ណោះ យុវជនកម្ពុជាបានហ្វឹកហាត់នៅជប៉ុនពីរសប្តាហ៍ថែមទៀតមុនពេលមកកម្ពុជាវិញដើម្បីប្រកួតក្នុងពាន AFF U16 Championship 2015 ដែលកម្ពុជាធ្វើជាម្ចាស់ផ្ទះ។

និយាយពីយុវជនអូស្ត្រាលីវិញ ជាក្រុមមួយដែលឆ្លងកាត់ការប្រកួតព្រឹត្តិការណ៍ធំៗបានច្រើន និងប្រកួតជាមួយបណ្តាប្រទេសរីកចម្រើនបាល់ទាត់ក៏ច្រើន ដូច្នេះជាបទពិសោធន៍ និងគុណភាពបាល់ពិតជាមិនធម្មតាឡើយ។ ៤ប្រកួតចុងក្រោយប៉ះសុទ្ធតែក្រុមខ្លាំង ហើយទទួលបានលទ្ធផលមិនល្អ។ ថ្ងៃទី២ ខែធ្នូ ឆ្នាំ២០១៤ យុវជនអូស្ត្រាលីចាញ់អង់គ្លេស២-១, ថ្ងៃទី៣០ ខែវិច្ឆិកា ឆ្នាំ២០១៤ អូស្ត្រាលីចាញ់អាមេរិក២-១, ថ្ងៃទី២៨ ខែវិច្ឆិកា ឆ្នាំ២០១៤ អូស្ត្រាលីចាញ់ប្រេស៊ីល ៤-០ និងថ្ងៃទី១៧ ខែកញ្ញា ឆ្នាំ២០១៤ អូស្ត្រាលីចាញ់កូរ៉េខាងជើងដោយបាល់ប៉េណាល់ទី៤-១ បន្ទាប់ពីស្មើគ្នា១-១។

នៅពូលB ជាមួយគ្នានេះដែរ ក្រុមសិង្ហបុរីត្រូវប្រកួតជាមួយក្រុមហ្វីលីពីនវេលាម៉ោង៣:៣០នាទីរសៀល។ ក្រុមទាំងពីរសុទ្ធតែបរាជ័យដូចគ្នាសម្រាប់ការប្រកួតលើកទីមួយដោយសិង្ហបុរីចាញ់មីយ៉ាន់ម៉ាដោយលទ្ធផល៣-១ ខណៈហ្វីលីពីនចាញ់កម្ពុជា១-០។

ក្រុម U-16 សិង្ហបុរី

ក្រុម U-16 ហ្វីលីពីន

តារាងពិន្ទុក្នុងពូល B
ល	ក្រុម	ចំនួនប្រកួត	ពិន្ទុ
១	U-16 មីយ៉ាន់ម៉ា	១	៣
២	U-16 កម្ពុជា	១	៣
៣	U-16 អូស្ត្រាលី	០	០
៤	U-16 ហ្វីលីពីន	១	០
៥	U-16 សិង្ហបុរី	១	០

សូមបងប្អូនចូលរួមមទស្សនាទាំងអស់គ្នាឲ្យបានច្រើនកុះករ!

ប្រភព Sabay News

Thursday, July 30, 2015