ខុមហ្វ្រែល៖ ការចុះមូលដ្ឋានរបស់អ្នកតំណាងរាស្ត្រមួយចំនួនធំ គឺទៅពង្រឹងផ្ទៃក្នុងប ~ KAS4UAll

ខុមហ្វ្រែល៖ ការចុះមូលដ្ឋានរបស់អ្នកតំណាងរាស្ត្រមួយចំនួនធំ គឺទៅពង្រឹងផ្ទៃក្នុងប

តាមរយៈ ការប្រមូលព័ត៌មានរបស់អង្គការខុមហ្វ្រែល តំណាងរាស្ត្រដែលមាន អាសនៈក្នុង រដ្ឋសភាចំនួន៩៦រូប ចំណោម ១២៣រូប បានចុះធ្វើការងារមូលដ្ឋាន ចំនួន ១២៧៤លើក ក្នុងនោះរួមមាន សកម្មភាពរបស់តំណាងរាស្ត្រគណបក្សសង្គ្រោះជាតិ (CNRP) ចំនួន ៦៦៤លើក និងគណបក្សប្រជាជនកម្ពុជា (CPP) ចំនួន ៦១០លើក ។ នេះបើតាម របាយការណ៍សង្កេតរដ្ឋសភា និងតំណាងរាស្ត្រនីតិកាលទី៥ ចាប់ពីខែកញ្ញា ២០១៣ ដល់ខែតុលា ឆ្នាំ២០១៤។

ដើមនីតិកាលទី៥នេះ CPP ទទួលបានអាសនៈក្នុងរដ្ឋសភាចំនួន ៦៨រូប ខុមហ្រែ្វលសង្កេត ឃើញមានតំណាងរាស្ត្រចំនួន ៥០រូប បានចុះធ្វើសកម្មភាពក្នុងមូលដ្ឋានបានចំនួន ៦១០លើក គិតជាមធ្យមតំណាងរាស្ត្រ១រូប ចុះមូលដ្ឋានបានចំនួន ១២លើក។ ដោយឡែកចំពោះCNRP ដែលមានអាសនៈក្នុងរដ្ឋសភាចំនួន ៥៥រូបវិញ តំណាងរាស្ត្រចំនួន ៤៦រូប បានចុះធ្វើសកម្មភាពមូលដ្ឋានរបស់គេចំនួន ៦៦៤លើក គិតជាមធ្យមតំណាងរាស្ត្រ១ រូប ចុះធ្វើសកម្មភាពការងារក្នុងមូលដ្ឋានបានចំនួន ១៤លើក។

មន្ត្រីជាន់ខ្ពស់នៃកម្មវិធីអង្កេតខុមហ្វ្រែល លោក កន សាវាង្ស បាននិយាយថា ក្នុងចំណោមសកម្មភាពចុះមូលដ្ឋានាសរុបទាំងអស់ ១២៧៤លើក តំណាងរាស្ត្រCPP និងCNRP បានធ្វើសកម្មភាពក្នុងគោលបំណងចំនួន៥ រួមមាន ការចុះពង្រឹងបណ្តាញផ្ទៃក្នុងបក្ស ចុះសួរសុខទុក្ខប្រជាជន ចុះអមដំណើរថ្នាក់ដឹកនាំ និងការចុះជួយដោះស្រាយបញ្ហា នានាក្នុងមូលដ្ឋាន។

បើតាមមន្ត្រីអង្កេតខុមហ្វ្រែល ការចុះមូលដ្ឋានរបស់តំណាងរាស្ត្រ CPP គឺបានផ្តោតលើការចុះ សំណេះសំណាលសួរសុខទុក្ខពលរដ្ឋ និងសម្ពោធសមិទ្ធិផលនានាបានចំនួន៣៥៩លើក និងអមដំណើរថ្នាក់ដឹកនាំបានចំនួន ១៦៨លើក។ ហើយថា ការចុះពង្រឹងផ្ទៃក្នុងគណបក្ស ចំនួន ៥៧លើក ចូលរួមវេទិកាសាធារណៈចំនួន៥លើក និងដោះស្រាយបញ្ហានានា ចំនួន២១លើក។ ចំពោះតំណាងរាស្ត្រ CNRP គឺបានផ្តោតលើការចុះ សំណេះសំណាលសួរ សុខទុក្ខពលរដ្ឋ និងចែកអំណោយចំនួន៣៤៨លើក និងគោលបំណងទី២ CNRP បានផ្តោតទៅលើការចុះពង្រឹងផ្ទៃក្នុងគណបក្សបានចំនួន២០៩លើក និងអមដំណើរថ្នាក់ ដឹកនាំគណបក្សចំនួន៧៧លើក។

ព័ត៌មានអំពីការចុះមូលដ្ឋានរបស់តំណាងរាស្ត្រនេះ អ្នកសង្កេតការណ៍ខុមហ្វ្រែលបានប្រមូល ពីការិយាល័យតំណាងរាស្ត្រទូទាំងប្រទេស ពីទីស្នាក់ការគណបក្ស ប្រព័ន្ធផ្សព្វផ្សាយនានា។

ទោះជាយ៉ាងណា លោក កន សាវាង្ស បាននិយាយថា របាយការណ៍ការចុះក្នុងមូលដ្ឋានទាំងCPP និងCNRP នេះ អាចតិចជាងចំនួនចុះជាក់ស្តែង ដោយលោកលើកឡើងថា៖«ការចុះ មូលដ្ឋានរបស់អ្នកតំណាងរាស្ត្រភាគច្រើន គឺមិនបានផ្តល់សកម្មភាពព័ត៌មានជាក់លាក់ ទៅឲ្យមន្ត្រីការិយាល័យតំណាងរាស្ត្រនៅតាមមណ្ឌលនោះទេ»៕

ប្រភព ThmeyThmey

Saturday, June 6, 2015