សហចៅក្រមស៊ើបអង្កេត លើកលែងការចោទលើអតីតមេបញ្ជាការទ័ពជើងអាកាសខ្មែរក្រហម ~ KAS4UAll

សហចៅក្រមស៊ើបអង្កេត លើកលែងការចោទលើអតីតមេបញ្ជាការទ័ពជើងអាកាសខ្មែរក្រហម

សហ ចៅក្រមស៊ើបអង្កេតនៃអង្គជំនុំជម្រះវិសាមញ្ញក្នុងតុលាការកម្ពុជា នៅថ្ងៃទី២ខែមិថុនា បានសម្រេចលើកលែងការចោទប្រកាន់ប្រឆាំង នឹងលោក ស៊ូ ម៉េត។ លោក ស៊ូ ម៉េត ជាអតីតមេបញ្ជាការទ័ពជើងអាកាសដែលជាជនសង្ស័យម្នាក់ ក្នុងដីកាសន្និដ្ឋានបញ្ជូនរឿងឲ្យស៊ើបសួរលើកទី២ ចេញដោយសហព្រះរាជអាជ្ញារស្តីទីអន្តរជាតិ កាលពីថ្ងៃទី៧ខែកញ្ញា ឆ្នាំ២០០៩ ។

សេចក្តីថ្លែងការណ៍របស់សហចៅក្រមស៊ើបអង្កេត នៅថ្ងៃទី៤មិថុនានេះ បានបញ្ជាក់ថា ចៅក្រមស៊ើបអង្កេតសន្និដ្ឋានថា មរណភាពរបស់ អតីតមេបញ្ជាការទ័ពជើងអាកាសរូបនេះ បានបញ្ចប់ការចោទប្រកាន់ព្រហ្មទណ្ឌប្រឆាំងនឹងរូបគាត់។

សេចក្តីថ្លែងការណ៍បន្តថា ការកំណត់ពីការទទួលខុសត្រូវ ព្រហ្មទណ្ឌ ដែលត្រូវបានចោទប្រកាន់ក្នុងដីកាសន្និដ្ឋានបញ្ជូនរឿងស៊ើបសួរ នឹងត្រូវធ្វើឡើងក្នុងពេលចេញដីការដំណោះស្រាយ អនុលោមតាមវិធាន៦៧ នៃវិធានផ្ទៃក្នុង។

អនុលោមតាមវិធាន៦៧(២) នៃវិធានផ្ទៃក្នុង ដើម្បីឲ្យសាធារណជនទទួលបានព័ត៌មានគ្រប់គ្រាន់អំពីការវិវឌ្ឍនៃ ដំណើរការនីតិវិធី ខណៈដែលថែររក្សាបានផងដែរនូវភាពសម្ងាត់នៃសំណុំរឿង សហចៅក្រមស៊ើបអង្កេតបានសម្រេចដាក់ជាសាធារណៈនៃសេចក្តីសម្រេចនេះ ដោយមានការកោសលុបនូវផ្នែកខ្លះ៕

ប្រភព ThmeyThmey

Saturday, June 6, 2015