អ.វ.ត.ក នឹងបើកសវនការលើបណ្តឹងសារទុក្ខក្នុងសំណុំរឿង០០២/០០១ នៅដើមខែកក្កដា ~ KAS4UAll

អ.វ.ត.ក នឹងបើកសវនការលើបណ្តឹងសារទុក្ខក្នុងសំណុំរឿង០០២/០០១ នៅដើមខែកក្កដា

បានចេញ ដីការកំណត់កាលបរិច្ឆេទសវនការលើកទីមួយទាក់ទងនឹងបណ្តឹងសារទុក្ខ ក្នុងសំណុំរឿង០០២/០០១ នៅថ្ងៃទី២ ទី៣ និងទី៦ខែកក្កដាខាងមុខ។ នៅថ្ងៃទី ៧ខែកក្កដា គឺជាថ្ងៃបម្រុង ប្រសិនបើត្រូវការពេលវេលាបន្ថែម។នេះបើយោងតាមសេចក្តីប្រកាសព័ត៌មាន របស់សាលាក្តីខ្មែក្រហម។

អង្គសវនការនេះ នឹងស្តាប់សក្ខីកម្មសាក្សី៣រូប ដែលអង្គជំនុំជម្រះបានសម្រេចកោះហៅតាមសេចក្តីសម្រេចចុះថ្ងៃទី២៩ ខែឧសភា ឆ្នាំ២០១៥ ។ ដោយឡែកសម្រាប់សវនការបន្ថែមទៀតដែលត្រូវរួមបញ្ចូលនូវសារណា ផ្ទាល់មាត់លើបញ្ហាដែលបានកើតឡើងនៅក្នុងបណ្តឹងសារទុក្ខនោះ អង្គជំនុំជម្រះ នឹងកំណត់កាលបរិច្ឆេទទៅតាមពេលវេលាសមស្រប។ នេះបើតាមសេចក្តីប្រកាសព័ត៌មានដដែល។

សូមបញ្ជាក់ថា សវនការនេះ ពាក់ព័ន្ធនឹងបណ្តឹងសារទុក្ខរបស់ព្រះរាជអាជ្ញារ នួន ជា និងខៀវ សំផន ប្រឆាំងនឹងសាលក្រមរបស់អង្គជំនុំជម្រះសាលាដំបូងក្នុងសំណុំរឿង០០២/០០១ ដែលបានចេញកាលពីខែសីហា ឆ្នាំ២០១៤ ។ សំណុំរឿង០០២វគ្គទី១អង្គជំនុំជម្រះវិសាមញ្ញក្នុងតុលាការកម្ពុជា បានសម្រេចកាត់ទោសជនជាប់ចោទ នួន ជា និង ខៀវ សំផនឲ្យជាប់គុកអស់មួយជីវិត។

សូមជម្រាបជូនថា បច្ចុប្បន្នអង្គជំនុំជម្រះវិសាមញ្ញក្នុងតុលាការកម្ពុជា កំពុងបន្តបើកសវនាការលើសំណុំរឿង០០២/០២ប្រឆាំងនឹងអតីតមេដឹកនាំ ខ្មែរក្រហមលោក នួន ជា និងលោក ខៀវ សំផន។ អង្គជំនុំជម្រះសាលាដំបូង នឹងធ្វើសវនាការដែលផ្តោតទៅលើការដ្ឋានការងារចំនួនបីជាបន្តបន្ទាប់ គឺទំនប់១មករាក្នុងខេត្តកំពង់ធំ ការដ្ឋានព្រលានយន្តហោះ ខេត្តកំពង់ឆ្នាំង និងទំនប់ត្រពាំងថ្ម ក្នុងខេត្តបន្ទាយមានជ័យ។ អង្គជំនុំជម្រះបានស្តាប់សក្ខីកម្មរបស់សាក្សី និងដើមបណ្តឹងរដ្ឋប្បវេណីចំនួន៧រូបហើយ។ ដោយឡែកនៅថ្ងៃទី៤ខែមិថុនានេះសាលាក្តីខ្មែក្រហម កំពុងស្តាប់ការផ្តល់សក្ខីកម្មសាក្សីទី៨ គឺ អ្នកស្រី ស៊ូ សឿន វ័យ៧៩ឆ្នាំ ជាភរិយា លោក កែ ពក ដែលជាអតីតកម្មាភិបាលខ្មែរក្រហម៕

ប្រភព ThmeyThmey

Saturday, June 6, 2015