សាក្សីទី៧ នឹងបញ្ចប់ការផ្តល់សក្ខីកម្ម ប្រឆាំងមេដឹកនាំខ្មែរក្រហមនៅថ្ងៃនេះ ~ KAS4UAll

សាក្សីទី៧ នឹងបញ្ចប់ការផ្តល់សក្ខីកម្ម ប្រឆាំងមេដឹកនាំខ្មែរក្រហមនៅថ្ងៃនេះ

អង្គជំនុំជម្រះ វិសាមញ្ញក្នុងតុលាការកម្ពុជានៅតែបន្តបើកសវនាការលើ សំណុំរឿង០០២/០២ប្រឆាំងនឹងអតីតមេដឹកនាំខ្មែរក្រហមលោក នួន ជា និងលោក ខៀវសំផន។ អង្គជំនុំជម្រះសាលាដំបូងនឹងធ្វើសវនាការដែលផ្តោតទៅលើការដ្ឋានការងារ ចំនួនបីជាបន្តបន្ទាប់ គឺទំនប់១មករាក្នុងខេត្តកំពង់ធំ ការដ្ឋានព្រលានយន្តហោះខេត្តកំពង់ឆ្នាំង និងទំនប់ត្រពាំងថ្មក្នុងខេត្តបន្ទាយមានជ័យ។

លោក នេត ភត្រា អ្នកនាំពាក្យសាលាក្តីខ្មែរក្រហម បានថ្លែងប្រាប់សារព័ត៌មានថ្មីៗនៅថ្ងៃនេះថា អង្គជំនុំជម្រះបានស្តាប់សក្ខីកម្មសាក្សីនិងដើមបណ្តឹងរដ្ឋប្បវេណី ចំនួន៧រូបហើយរហូតមកដល់ថ្ងៃទី៣ខែមិថុនានេះ។ នៅថ្ងៃពុធនេះដែរ អង្គជុំនំជំរះនឹងបញ្ចប់ការផ្តល់សក្ខីកម្មរបស់សាក្សីទី៧គឺលោក អ៊ុត សេង។

នៅចំពោះមុខ សវនការលោក អ៊ុត សេង បានថ្លែងរៀបរាប់ពីស្ថានភាពថាមានការបង្ខំឲ្យធ្វើការងារ យ៉ាងធ្ងន់ធ្ងរនៅទំនប់១មករា ប្រជាពលរដ្ឋត្រូវធ្វើការគ្មានពេលឈប់សម្រាក និងបរិភោគមិនគ្រប់គ្រាន់ កង្វះអនាម័យ និងខ្វះការថែទាំសុខភាពជាដើម។ សាក្សីរូបនេះ ក៏បានបង្ហាញពីទីតាំងសម្លាប់មនុស្សនៅមន្ទីរសន្តិសុខក្នុងវត្ត បារាយណ៍ជាន់ដែក នៅក្បែរតំបន់ការដ្ឋានការងារនោះនៅក្នុងស្រុកបារាយណ៍ ខេត្តកំពង់ធំផងដែរ។ នេះបើតាម លោក នេត ភត្រា ដដែល។

បើតាមគម្រោង អង្គជំនុំជម្រះសាលាដំបូងនៃសាលាក្ដីខ្មែរក្រហម នឹងរៀបចំស្តាប់ការផ្តល់សក្ខីកម្មពីដើមបណ្តឹងរដ្ឋប្បវេណីនិងសាក្សី ចំនួន១០រូប សម្រាប់អង្គហេតុទាក់ទងនឹងការដ្ឋានការងារទំនប់១មករា នៅក្នុងខេត្តកំពង់ធំ។

សូមបញ្ជាក់ថា សាក្សី និងដើមបណ្តឹងរដ្ឋប្បវេណីទាំង៧រូបដែលត្រូវបានកោះហៅមកផ្តល់សាក្សី កម្មនៅក្នុងដំណើរការសវនាការលើសំណុំរឿង ០០២/០២ទាក់ទងនឹងការដ្ឋានការងារទំនប់១ មករា រួមមាន លោក ឱហូអតីតកម្មាភិបាលខ្មែរក្រហមលោក ប៉ិច សុខាអតីតអ្នកបច្ចេកទេសវាស់ស្ទង់មួយរូបនៅការដ្ឋានទំនប់១មករា អ្នកស្រីមាស ឡៃហួរអតីតនារីកងចល័តនៅក្នុងការដ្ឋានការងារនេះអ្នកស្រី ហ៊ុន សិត្ថានី ដើមបណ្តឹងរដ្ឋប្បវេណី អ្នកស្រី សៀង សូវីដា អ្នក អ៊ុន រ៉ន និងលោក អ៊ុត សេង៕

ប្រភព ThmeyThmey

Saturday, June 6, 2015