លោក ហង្ស ពុទ្ធា សមាជិកទីប្រាំបួនរបស់ គ.ជ.ប និងជាអ្នកនាំពាក្យរបស់ស្ថាប័ននេះដែលមកពីសង្គមស៊ីវិល បានប្រាប់ភ្នំពេញ ប៉ុស្តិ៍ កាលពីម្សិលមិញថា គ.ជ.ប កំពុងរៀបចំរចនាសម្ព័ន្ធនៃអគ្គលេខាធិការដ្ឋានរបស់ គ.ជ.ប និងមន្រ្តីឡើងវិញ។ ប៉ុន្តែ លោក ពុទ្ធា មិនបានប្រាប់ពីកម្មវិធីជាក់លាក់នៃការផ្លាស់ប្តូរលោក ទេព នីថា អគ្គលេខាធិការ គ.ជ.ប បច្ចុប្បន្នទេ ដោយលោកបញ្ជាក់ថា ការផ្លាស់ប្តូរ ឬរៀបចំរចនាសម្ព័ន្ធឡើងវិញ នឹងបញ្ចប់មិនឲ្យលើសពីរយៈពេល ៣ ខែ ឡើយ។
លោក ពុទ្ធា បានបញ្ជាក់ថា៖ «យើងមិនអាចទុកឲ្យយូរទៀតទេ។ យើងជាប់រវល់ខ្លាំងណាស់ធ្វើកិច្ចការជាច្រើន មិនឲ្យលើសពីបីខែទេ ទាំងរចនាសម្ព័ន្ធ និងមន្ត្រី គ.ជ.ប»។
ទោះជាយ៉ាងណា លោក ពុទ្ធា នៅតែបដិសេធដោយមិនផ្តល់ការបញ្ជាក់ពីបេក្ខភាពអគ្គលេខាធិការថ្មីទេ ហើយថា តើនៅពេលណាដែលអគ្គលេខាធិការថ្មីត្រូវចូលកាន់តំណែងនោះឡើយ ដោយលោកលើកឡើងថា នេះគឺជារឿងរសើបសម្រាប់ការបោះឆ្នោត ដោយថា អគ្គលេខាធិការ គ.ជ.ប គឺជាបុគ្គលសំខាន់ពាក់ព័ន្ធនឹងការបោះឆ្នោត។
លោក ហង្ស ពុទ្ធា បានលើកឡើងថា៖ «ពេលនេះ អគ្គលេខាធិការ [គ.ជ.ប] គឺជាសេនាធិការរបស់ គ.ជ.ប ធ្វើការក្រោមការចង្អុលបង្ហាញពី គ.ជ.ប ខណៈដែលកាលពីលើកមុន អគ្គលេខាធិការ គ.ជ.ប គឺជា អ្នកប្រតិបត្តិ គ.ជ.ប ជាអ្នកសម្រេចកិច្ចការបោះឆ្នោត។ ប៉ុន្តែអគ្គលេខាធិការថ្មីមិនបែបនោះទេ»។
នៅពេលដែលទាក់ទងកាលពីម្សិលមិញ លោក ទេព នីថា អគ្គលេខាធិការ គ.ជ.ប បច្ចុប្បន្ន ដែលនៅតែបន្តការងារពី គ.ជ.ប ចាស់ បានបដិសេធធ្វើអត្ថាធិប្បាយលម្អិត ដោយលោកនិយាយថា លោកតែងតែអនុវត្តទៅតាមច្បាប់ គ.ជ.ប ។
លោក នីថា លើកឡើងថា៖ «អគ្គលេខាធិការមុនបានធ្វើតាមច្បាប់ គ.ជ.ប និងមេដឹកនាំ។ មិនដែលមានអគ្គលេខាធិការណាមួយ មិនធ្វើតាមអ្នកដឹកនាំទេ»។
គ.ជ.ប ចាស់ត្រូវបានមជ្ឈដ្ឋានជាតិ និងអន្តរជាតិជាច្រើនចាត់ទុកថា ជាស្ថាប័នលម្អៀង ទៅរកគណបក្សកាន់អំណាច។ គណបក្សសង្គ្រោះជាតិ ប្រជាពលរដ្ឋជាច្រើន និងអង្គការក្រៅរដ្ឋាភិបាលមួយចំនួនបានចាត់ទុក គ.ជ.ប ចាស់ ថា ជាឧបករណ៍របស់គណបក្សប្រជាជនកម្ពុជា។
លោក គល់ បញ្ញា នាយកប្រតិបត្តិនៃអង្គការខុមហ្វ្រែល បានយល់ស្របនឹងការលើកឡើងដែលថា អគ្គលេខាធិការរបស់ គ.ជ.ប គឺជាអ្នកប្រតិបតិ្តរបស់ គ.ជ.ប ប៉ុន្តែបានសង្កត់ធ្ងន់ថា អគ្គលេខាធិការ បន្ទាប់ពីសម្រេច និងធ្វើអ្វីមួយ ត្រូវរាយការណ៍ជូនថ្នាក់ដឹកនាំ គ.ជ.ប ព្រោះគាត់ធ្វើការក្រោមការចង្អុលបង្ហាញរបស់ថ្នាក់ដឹកនាំ គ.ជ.ប។
លោក បញ្ញា បន្តថា៖ «អគ្គលេខាធិការ ត្រូវតែមានការទទួលខុសត្រូវនៅចំពោះមុខច្បាប់ គ.ជ.ប ប៉ុន្តែកាលពីលើកមុនគ្មានទេ។ អគ្គលេខាធិការចាស់ធ្វើតាមទស្សនៈផ្ទាល់ខ្លួន។ [អគ្គលេខាធិការចាស់] ត្រូវបានគេមើលឃើញថា លម្អៀងទៅរកគណបក្សនយោបាយ»៕
ប្រភព Phnom Penh Post
8:47 AM
Unknown
Posted in: 
