របាយការណ៍នេះ បានទាញយកការសិក្សាជាង ៣៦០ ករណីនៃការធ្វើបាបទៅលើកុមារក្នុងតំបន់ចាប់តាំងពីឆ្នាំ ២០០០ ដែលក្នុងនោះរួមមានការរំលោភបំពានផ្លូវចិត្ត ការរំលោភបំពានផ្លូវកាយ ការរំលោភបំពានផ្លូវភេទ ការមិនអើពើ និងការមើលឃើញផ្ទាល់ភ្នែកនៃអំពើហិង្សាក្នុងគ្រួសារ និងការស្លាប់ពីការប្រព្រឹត្តព្រៃផ្សៃ បានធ្វើឲ្យមានការខាតបង់យ៉ាងច្រើន។
របាយការណ៍ឲ្យដឹងថា៖ «ការប្រព្រឹត្តព្រៃផ្សៃលើកុមារអាចមានផលវិបាកផ្នែកសេដ្ឋកិច្ច អស់មួយជីវិតដែលកើតចេញដោយផ្ទាល់ ឬដោយប្រយោលពីបញ្ហាសុខភាពផ្លូវកាយ និងផ្លូវចិត្ត បង្កើនហានិភ័យសម្រាប់ឥរិយាបថហិង្សា ភាពពិការដោយសារតែរបួស សុខភាពចុះខ្សោយ កម្រិតការអប់រំទាប និងសមត្ថភាពធ្លាក់ចុះជាពិសេសចំពោះការបង្កើតប្រាក់ចំណូល»។
ដោយប្រើទិន្នន័យពីរបាយការណ៍នេះ អ្នកស្រាវជ្រាវបានគណនាប្រភេទនៃការរំលោភបំពាន និងដាក់ប្រភេទទាំងនោះទៅក្នុងទិន្នន័យដែលបានមកពីគម្រោងបន្ទុក ជំងឺសកលឆ្នាំ ២០០៤ របស់អង្គការសុខភាពពិភពលោកដើម្បីធ្វើការប្រៀបធៀបរវាងអនុតំបន់ ចំនួនបួន។
របាយការណ៍ក៏បានប្រៀបធៀបទិន្នន័យពីធានាគារពិភពលោកផងដែរ ដើម្បីទាញការប្រៀបធៀបរវាងកម្រិតប្រាក់ចំណូលផ្សេងគ្នា។ របាយការណ៍បានរកឃើញថា ចន្លោះពី ១៤ ទៅ ៣៧ ភាគរយនៃកុមារពីអនុតំបន់ផ្សេងៗគ្នាបានជួបបទពិសោធយ៉ាងហោចណាស់ មួយប្រភេទក្នុងចំណោមប្រភេទនៃការរំលោភបំពានពីមុនពួកគេឈានដល់ អាយុ ១៨ ឆ្នាំ ខណៈទម្រង់ផ្សេងៗនៃការរំលោភបំពានខុសគ្នាទៅតាមកម្រិតប្រាក់ ចំណូល។
របាយការណ៍នេះក៏បានរកឃើញគំរូនៃការរំលោភបំពានផ្សេងៗ គ្នារវាងយ៉េនឌ័រ ខណៈក្មេងស្រីទំនងជាទទួលរងការរំលោភបំពានផ្លូវភេទច្រើនជាង រីឯក្មេងប្រុសទទួលរងការរំលោភបំពានរាងកាយ និងផ្លូវចិត្តធ្ងន់ធ្ងរជាង។
បើទោះបីជាការរំលោភបំពានមានទំនោរកើនឡើងខណៈកម្រិតប្រាក់ចំណូល ធ្លាក់ចុះ ការរំលោភបំពានផ្លូវភេទក្នុងចំណោមក្មេងស្រីគឺកើតមានច្រើន នៅក្នុងបណ្តាប្រទេសចំណូលក្រោមកម្រិតមធ្យមជាងបណ្តាប្រទេសចំណូល កម្រិតមធ្យម ខណៈភាពមិនអើពើកើតមានច្រើននៅក្នុងបណ្តាប្រទេសមានប្រាក់ចំណូលលើ កម្រិតមធ្យម ជាងបណ្តាប្រទេសមានប្រាក់ចំណូលកម្រិតក្រោមមធ្យម។
កម្ពុជាបច្ចុប្បន្នត្រូវបានចុះបញ្ជីថាជាប្រទេសចំណូលទាប បើទោះបីជាត្រូវបានព្យាករដោយទីភ្នាក់ងារអន្តរជាតិផ្សេងៗថា នឹងឈានដល់ចំណូលកម្រិតទាបជាងមធ្យមនាពេលប៉ុន្មានឆ្នាំខាងមុខ ក្តី។
ដោយប្រៀបធៀបនឹងលទ្ធផលរកឃើញរបស់របាយការណ៍នេះ ការសិក្សាមួយអំពីការប្រព្រឹត្តព្រៃផ្សៃក្នុងប្រទេសកម្ពុជា ចេញដោយអង្គការ UNICEF កាលពីខែវិច្ឆិកាបានរកឃើញថា ៥០ ភាគរយនៃកុមារកម្ពុជាទទួលរងការរំលោភបំពានយ៉ាងហោចណាស់មួយទម្រង់ នៃការរំលោភបំពាន។
Rana Flowers តំណាងប្រចាំកម្ពុជារបស់អង្គការ UNICEF បានថ្លែងនៅក្នុងសន្និសីទកាសែតមួយថា៖ «ការស្រាវជ្រាវនេះធ្វើឲ្យយើងអាចបង្ហាញទំហំនៃបញ្ហាក្នុង ប្រទេសកម្ពុជាហើយជួយយើងធ្វើឲ្យមានការផ្លាស់ប្តូរ»។
របាយការណ៍ក៏បានសង្កត់ធ្ងន់ផងដែរថា ការលើកកម្ពស់ការយល់ដឹង គឺជាហេតុផលសំខាន់សម្រាប់ការសិក្សានេះ ហើយជំរុញរដ្ឋាភិបាលឲ្យយកលទ្ធផលនេះថា ជាការអំពាវនាវឲ្យមានចំណាត់ការខ្លាំងជាងមុនក្នុងការដោះស្រាយ បញ្ហានេះ។
ការអំពាវនាវនោះត្រូវបានគាំទ្រដោយអង្គការមិត្តសម្លាញ់ ដែលជាអង្គការដៃគូរបស់អង្គការ UNICEF ប្រចាំកម្ពុជា ដែលធ្វើការងារខ្លាំងក្លាក្នុងការប្រយុទ្ធនឹងការរំលោភបំពានលើ កុមារក្នុងប្រទេសកម្ពុជាតាមរយៈកម្មវិធីកុមារសុវត្ថិភាពរបស់ខ្លួន។
ខេម រ៉េតវ៉ាន់ អ្នកសម្របសម្រួលសម្រាប់កម្មវិធីកុមារសុវត្ថិភាពថ្លែងថា៖ «រាល់ទម្រង់នៃការរំលោភបំពាន និងហិង្សាលើកុមារទាំងអស់ គឺមិនអាចទទួលយកបាន ដូច្នេះយើងត្រូវតែអនុវត្តដំណោះស្រាយដែលអាចធ្វើទៅបាន»៕
ប្រភព Phnom Penh Post
8:49 AM
Unknown
Posted in: 
