ព្រឹទ្ធាចារ្យខ្មែរបីរូបទទួលងារជា"ពលករជំនាញឆ្នើម The best worker" ~ KAS4UAll

ព្រឹទ្ធាចារ្យខ្មែរបីរូបទទួលងារជា"ពលករជំនាញឆ្នើម The best worker"

ខេត្តសៀមរាប៖ ព្រឹទ្ធាចារ្យជាជនជាតិខ្មែរ៣រូប ដែលមានជំនាញផ្នែកជួសជុល ប្រាសាទឥដ្ឋអស់រយៈពេលជាង២០ឆ្នាំ បានទទួលងារជាពលករជំនាញឆ្នើម “The best worker" ក្នុងកិច្ចប្រជុំបច្ចេកទេសលើកទី២៤ របស់អាយស៊ីស៊ីអង្គរ។ នេះបើយោងតាមទំព័រ Facebook របស់អាជ្ញាធរជាតិអប្សរា ធ្វើការផ្សាយនៅថ្ងៃទី០៥ ខែមិថុនា ឆ្នាំ២០១៥។

ប្រភពដដែលបានបន្តថា ងារនេះត្រូវបានប្រគល់ជូនដោយ ឯកឧត្ដមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា ក្នុងឱកាសនៃកិច្ចប្រជុំបច្ចេកទេស លើកទី២៤ របស់គណៈកម្មាធិការអន្តរជាតិ សម្របសម្រួលកិច្ចគាំពារ និងអភិវឌ្ឍន៍តំបន់អង្គរ ហៅកាត់ថា អាយស៊ីស៊ី-អង្គរ នាថ្ងៃទី០៥ ខែមិថុនា ឆ្នាំ២០១៥។

ព្រឹទ្ធាចារ្យខ្មែរ ដែលមានជំនាញខាងជួសជុលប្រាសាទឥដ្ឋទាំង៣រូបនេះ រួមមាន លោកតា ស៊ឹម អៃ អាយុ៧០ឆ្នាំ លោកតា ស៊ឹម អឿម អាយុ៦៣ឆ្នាំ និងលោកតា ភេម ភឿម អាយុ៦៨ឆ្នាំ មានទីលំនៅជិតប្រាសាទបាគង ស្រុកប្រាសាទបាគង ខេត្តសៀមរាប។

លោកតា ស៊ឹម អឿម បានរៀបរាប់ថា លោកតា និងក្រុមការងារបានចាប់ផ្តើមការងារជួសជុលប្រាសាទឥដ្ឋតាំងពីនៅ ក្មេងៗ ដោយឪពុករបស់លោកតាក៏ជាអ្នកជួសជុល និងបង្ហាត់បង្ហាញគាត់ដែរ ហើយលោកតាបន្តថា ការងារនេះ លោកតាចេះពីឪពុកលោកខ្លះ និងទទួលបានការបណ្តុះបណ្តាលបន្ថែមពីអ្នកជំនាញ ហុងគ្រី អ៊ីតាលី និងអាល្លឺម៉ង់ ក្នុងពេលដែលលោកតាចូលរួមធ្វើការជាមួយពួកគេតាំងពីឆ្នាំ១៩៩៤ មក៕

ប្រភព Kqube

Saturday, June 6, 2015