ស្ពានមិត្តភាពកម្ពុជា-ចិនតាខ្មៅ នឹងត្រូវសម្ពោធបើកឲ្យប្រើបា្រស់នៅថ្ងៃទី៣ សីហា ក្រោមអធិបតីភាពសម្តេចតេជោ ហ៊ុន សែន ~ KAS4UAll

ស្ពានមិត្តភាពកម្ពុជា-ចិនតាខ្មៅ នឹងត្រូវសម្ពោធបើកឲ្យប្រើបា្រស់នៅថ្ងៃទី៣ សីហា ក្រោមអធិបតីភាពសម្តេចតេជោ ហ៊ុន សែន

រាជធានីភ្នំពេញ ៖ បើគ្មានអ្វីប្រែប្រួលនោះទេ សម្តេចតេជោ ហ៊ុន សែន និង សម្តេចកិត្តិព្រឹទ្ឋបណ្ឌិត ប៊ុន រ៉ានី ហ៊ុន សែន នឹងអញ្ជើញជាអធីបតីភាពសម្ពោធដាក់ឲ្យប្រើប្រាស់ជាផ្លូវការ ស្ពានមិត្តភាពកម្ពុជា-ចិនតាខ្មៅ និង ផ្លូវតភ្ជាប់ប្រវែងជិត១២គីឡូម៉ែត្រពីផ្លូវជាតិលេខ២ទៅផ្លូវជាតិលេខ១នៅព្រឹកថ្ងៃទី០៣ សីហា ២០១៥ ។

នេះបើយោងតាមសេចក្តីជូនដំណឹងចុះថ្ងៃទី២៨ កក្កដា របស់ក្រសួងសាធារណការ និងដឹកជញ្ជូន ។

ស្ពានមិត្តភាពកម្ពុជា-ចិនតាខ្មៅ ឆ្លងកាត់ទន្លេបាសាក់ មានប្រវែង៨៥៥ម៉ែត្រ ទទឹង១៣,៥ម៉ែត្រ ជាប្រភេទស្ពានបេតុងខ្សែកាបរឹត មានចន្លោះសសរស្ពាន២៥ចន្លោះ ស្ពានមេនៅកណ្តាលទន្លេមានប្រវែង២២៦ម៉ែត្រមាន៣ចន្លោះ ចន្លោះនៅកណ្តាលទន្លេមានគន្លងទឹកសម្រាប់នាវាចរណ៍ មានទទឹង៩០ម៉ែត្រ កម្ពស់៨ម៉ែត្រគិតពីផ្ទៃទឹកទន្លេនៅរដូវទឹកឡើងខ្ពស់បំផុត ។ ផ្លូវភ្ជាប់ពីគល់ស្ពានទាំងសងខាងប្រវែងជាង១១គីឡូម៉ែត្រ ដោយត្រើយខាងកើតផ្លូវភ្ជាប់ក្បាលស្ពានជាង៨គីឡូម៉ែត្រ និង ត្រើយខាងលិចជិត៣គីឡូម៉ែត្រ ។

ស្ពានដែលស្ថិតនៅក្នុងភូមិព្រែកសំរោង១ សង្កាត់-ក្រុងតាខ្មៅនេះ សាងសង់ ដោយក្រុមហ៊ុន សាជីវកម្មចិន និងត្រួតពិនិត្យបច្ចេកទេសដោយក្រុមហ៊ុនខ្វាវចូវខ្វាវអាននៃសាធារណរដ្ឋប្រជាមានិតចិន ។

ស្ពានមិត្តភាពកម្ពុជា-ចិនតាខ្មៅបានត្រូវសម្ពោធបើកដំណើការសាងសង់ក្រោមអធិបតីភាពសម្តេចតេជោនាយករដ្ឋមន្រ្តីកាលពីថ្ងៃទី០៦ កក្កដា ២០១១ និង ចំណាយថវិកាសាងសង់ជិត៣៣លានដុល្លារអាមេរិក បានមកពីកម្ចីឥណទានពីសាធារណរដ្ឋប្រជាមានិតចិន ៕

ប្រភព Koh Santepheap Daily

Thursday, July 30, 2015