លោក ហ៊ុន សែន រិះគន់បក្សប្រឆាំងដែលចង់ឲ្យប្តឹងវៀតណាម ~ KAS4UAll

លោក ហ៊ុន សែន រិះគន់បក្សប្រឆាំងដែលចង់ឲ្យប្តឹងវៀតណាម

ភ្នំពេញៈ លោកនាយករដ្ឋមន្ត្រី ហ៊ុន សែន បានរិះគន់បកលើសំណើរបស់គណបក្សប្រឆាំងដែលស្នើឲ្យដាក់ពាក្យបណ្តឹងទៅតុលាការយុត្តិធម៌អន្តរជាតិប្រឆាំងនឹងការទន្ទ្រានលើទឹកដីកម្ពុជាដោយវៀតណាម។

ឆ្លើយតបនឹងលិខិតរួមមួយដែលបានផ្ញើដោយអ្នកតំណាងរាស្រ្តគណបក្សសង្គ្រោះជាតិចំនួន ១២ រូប កាលពីថ្ងៃទី ៣០ ខែមិថុនាដែលទាមទារឲ្យលោកនាយករដ្ឋមន្រ្តីចាត់វិធានការប្រឆាំងនឹងប្រទេសវៀតណាមតាមរយៈតុលាការយុត្តិធម៌អន្តរជាតិលោកនាយករដ្ឋមន្រ្តីបានរិះគន់គណបក្សប្រឆាំងថាមិនយកចិត្តទុកដាក់លើកិច្ចខិតខំប្រឹងប្រែងរបស់រដ្ឋាភិបាលក្នុងការដោះស្រាយបញ្ហាព្រំដែន។

ដោយមិនលើកឡើងពីសំណើទាក់ទងនឹងតុលាការយុត្តិធម៌អន្តរជាតិ លោក ហ៊ុន សែន ក្នុងលិខិតមួយដែលបានផ្ញើទៅលោក ហេង សំរិន ប្រធានរដ្ឋសភាចុះថ្ងៃទី ២៤ ខែកក្កដាដែលទើបត្រូវបានចែកចាយកាលពីម្សិលមិញបានឲ្យដឹងថារដ្ឋាភិបាលបានចាត់ទុកការការពារអធិបតេយ្យរបស់កម្ពុជាគឺជា «កាតព្វកិច្ចសំខាន់» បំផុតរបស់ខ្លួន។

លោក ហ៊ុន សែន សរសេរថា៖ «[កិច្ចខិតខំប្រឹងប្រែងរបស់យើង] មិនត្រូវបានមើលឃើញ ឬធ្វើពុតជាមើលមិនឃើញដោយមជ្ឈដ្ឋានមួយចំនួន»។ «បញ្ហាព្រំដែននេះត្រូវគេយក [ប្រយោជន៍] ដើម្បីចំណេញនយោបាយសម្រាប់ [គណបក្សប្រឆាំង]»។

តំណាងរាស្ត្រគណបក្សសង្គ្រោះជាតិកាលពីពេលថ្មីៗនេះបានចុះទៅពិនិត្យព្រំដែនជាបន្តបន្ទាប់ហើយបានផ្សព្វផ្សាយពីការរំលោភទន្ទ្រានរបស់វៀតណាមចូលមកក្នុងទឹកដីខ្មែរក្នុងខេត្តតាមព្រំដែនដែលរួមមានករណីវៀតណាមចូលមកជីកស្រះទឹកចំនួន ៨ នៅខេត្តរតនគិរីធ្វើផ្លូវនៅស្វាយរៀង និងសាងសង់ប៉ុស្តិ៍យោធានៅស្រុកកោះធំខេត្តកណ្តាល។

ក្នុងចំណោមការឆ្លើយតបរបស់រដ្ឋាភិបាល លោក ហ៊ុន សែន បានលើកឡើងពីការតវ៉ាតាមផ្លូវទូតទៅទីក្រុងហាណូយអំពីការទន្ទ្រាន និងសំណើរបស់លោកដែលស្នើសុំផែនទីផលិតដោយបារាំងដែលចែងក្នុងរដ្ឋធម្មនុញ្ញពីអង្គការសហប្រជាជាតិដើម្បីផ្ទៀងផ្ទាត់ពីដំណើរការបោះបង្គោលព្រំដែន។

លោក អ៊ុំ សំអាន តំណាងរាស្ត្រគណបក្សប្រឆាំងដែលបានចុះហត្ថលេខាលើលិខិតរួមនោះបានប្រៀបធៀបការឆ្លើយតបរបស់លោកនាយករដ្ឋមន្ត្រីនេះថា «ខ្សោយ» ជាមួយនឹងបណ្តឹងរបស់រដ្ឋាភិបាលទៅតុលាការយុត្តិធម៌អន្តរជាតិប្រឆាំងនឹងការចូលលុកលុយរបស់ថៃនៅតំបន់ព្រំដែនដែលមានវិវាទនៅក្នុងខេត្តព្រះវិហារ៕

ប្រភព Post Khmer

Thursday, July 30, 2015