មន្ត្រីសាលាក្តី៖ សៀវភៅសាលក្រម០០២/០១ និងសាលដីកា០០១ មានប្រយោជន៍ច្រើន ~ KAS4UAll

មន្ត្រីសាលាក្តី៖ សៀវភៅសាលក្រម០០២/០១ និងសាលដីកា០០១ មានប្រយោជន៍ច្រើន

មន្ត្រី សាលាក្តីខ្មែរក្រហម បានចុះចែកសៀវភៅសាលក្រមសំណុំរឿង ០០២/០១ និងសាលដីកាសំណុំរឿង០០១ ដល់មន្ត្រីតុលាការខេត្តព្រះសីហនុ កែប កំពត កោះកុង ព្រមទាំងមន្ត្រីអនុវត្តច្បាប់ពាក់ព័ន្ធនានា និងនិស្សិតប្រមាណ២០០នាក់ នៅសាលាដំបូងខេត្តព្រះសីហនុ កាលពីថ្ងៃទី២២ ខែឧសភា ឆ្នាំ២០១៥ ។

លោក ក្រាញ់ តូនី ប្រធានការិយាល័យរដ្ឋបាលស្តីទីនៃសាលាក្តីខ្មែរក្រហម បានគូសបញ្ជាក់ពីសារសំខាន់នៃការចែកសៀវភៅសាលក្រមសំណុំរឿង ០០២/០១ និងសាលដីកាសំណុំរឿង០០១ ដែលអាចឲ្យមន្ត្រីតុលាការ មន្ត្រីអនុវត្តច្បាប់ពាក់ព័ន្ធនានាក្នុងការយល់ដឹងបន្ថែមពី ប្រវត្តិសាស្ត្រនៃរបបខ្មែរក្រហម ដំណើរការអនុវត្តនីតិវិធីច្បាប់ យុត្តិសាស្ត្រ និងបទពិសោធន៍សំខាន់ៗផ្សេងទៀត ដែលបានអនុវត្តនៅតុលាការចម្រុះកម្ពុជា និងអង្គការសហប្រជាជាតិនេះ។

លោក នីខូឡាស គុំជាន សហព្រះរាជអាជ្ញាអន្តរជាតិនៃសាលាក្តីខ្មែរក្រហមបញ្ជាក់ថាកិច្ចដំណើរការនីតិ

វិធី ដែលអង្គជំនុំជម្រះវិសាមញ្ញក្នុងតុលាការកម្ពុជា ជាកិច្ចការដ៏សំខាន់នៅក្នុងប្រវត្តិសាស្ត្រកម្ពុជា និងពិភពលោកទាំងមូល។ តុលាការនេះបានស្វែងរកមូលហេតុនៃការបង្កសោកនាដកម្ម ដែលរដ្ឋាភិបាលខ្មែរក្រហមបានបង្កឡើង។

លោកបន្តថា សេចក្តីសម្រេចរបស់អង្គជំនុំជម្រះវិសាមញ្ញក្នុងតុលាការកម្ពុជាដែលយក យុត្តិសាស្ត្រនៃតុលាការនានា មកអនុវត្ត បានកំពុងតែត្រូវបានសិក្សា និងដកស្រង់យកនូវយុត្តិសាស្ត្រពីសាលាក្តីខ្មែរក្រហមទៅសិក្សា និងអនុវត្តផងដែរ។

បើតាមលោក ម៉ុង មុន្នីចរិយា ប្រធានសាលាដំបូងខេត្តព្រះសីហនុសាលក្រមទាំងនេះនឹងផ្តល់ឲ្យមន្ត្រី តុលាការ និងអ្នកអនុវត្តច្បាប់នានាយល់ដឹងបន្ថែមពីប្រវត្តិសាស្ត្រ ក៏ដូចជា យុត្តិសាស្ត្រ ការអនុវត្តច្បាប់ បទដ្ឋាននានានិងនីតិវិធីដែលបានអនុវត្តនៅសាលាក្តីខ្មែរក្រហម ត្រូវបានអ្នកច្បាប់របស់យើងយកមកសិក្សារៀនសូត្រ និងទា

ញយកបទពិសោធន៍មកអនុវត្តនៅក្នុងការ។

ចំណែកលោក សុខ ផន អភិបាលរងខេត្តព្រះសីហនុ បានថ្លែងថា រហូតមកទល់ពេលនេះ ជនរងគ្រោះនៃរបបខ្មែរក្រហមបានទទួលនូវការពិត និងយុត្តិធម៌ជាបណ្តើរៗពីការជំនុំជម្រះក្តីនៅអង្គជំនុំជម្រះវិសាមញ្ញ ក្នុងតុលាការកម្ពុជា។ ជនរងគ្រោះមួយចំនួនធំ បានធូរស្បើយពីជំងឺផ្លូវចិត្ត និងមានការពេញចិត្តចំពោះសាលក្រម ដែលប្រកាសដោយអង្គជំនុំជម្រះនាពេលកន្លងមក។

នេះជាលើកទី២ ហើយដែលអង្គជំនុំជម្រះវិសាមញ្ញក្នុងតុលាការកម្ពុជាបានធ្វើពិធី ផ្សព្វផ្សាយ និងចែកសាលក្រមសំណុំរឿង ០០២/០១ ប្រឆាំងនឹងអតីតមដឹកនាំខ្មែរក្រហម នួន ជា និងខៀវ សំផន ដល់មន្ត្រីតុលាការ និងមន្ត្រីអនុវត្តច្បាប់ ស្ថាប័នពាក់ព័ន្ធនានា និស្សិត និងអ្នកស្រាវជ្រាវនានា៕

ប្រភព ThmeyThmey

Saturday, June 6, 2015