កម្ពុជាតវ៉ាគម្រោងសាងសង់ប្រាសាទនៅឥណ្ឌាដែលចំលងតាមប្រាសាទអង្គរវត្ត ~ KAS4UAll

កម្ពុជាតវ៉ាគម្រោងសាងសង់ប្រាសាទនៅឥណ្ឌាដែលចំលងតាមប្រាសាទអង្គរវត្ត

ដូនជីអង្គុយសមាធិនៅប្រាសាទអង្គរវត្ត ខេត្តសៀមរាប។ រូបថតខែមិថុនា ២០១២

RFA

ក្រសួងការបរទេស និងសហប្រតិបត្តិការអន្តរជាតិ បានផ្ញើកំណត់ទូតតវ៉ាទៅក្រសួងការបរទេសឥណ្ឌា ឲ្យបញ្ឈប់គម្រោងសាងសង់ប្រាសាទ ដែលចម្លងតាមរចនាបថប្រាសាទអង្គរវត្ត។
អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ លោក កុយ គួង ថ្លែងនៅថ្ងៃទី៦ ខែមិថុនា ថា ក្រសួងបានសរសេរកំណត់ទូតតវ៉ា ដោយចាត់ទុកការសាងសង់ចម្លងតាមប្រាសាទអង្គរវត្តខ្មែរ ដើម្បីផលប្រយោជន៍ពាណិជ្ជកម្ម គឺជាការរំលោភបំពានយ៉ាងធ្ងន់ធ្ងរដល់សម្បត្តិបេតិកភណ្ឌពិភពលោក ដែលមានតម្លៃមនុស្សជាតិលេចធ្លោជាសកល។
លោកស្នើឲ្យក្រសួងការបរទេសឥណ្ឌា ពិចារណាជាបន្ទាន់នូវគម្រោងសាងសង់នេះ៖ «ប្រាសាទអង្គរវត្តជានិមិត្តរូបដែលមាននៅក្នុងទង់ជាតិកម្ពុជា ជាច្រើនសតវត្សមកហើយ។ ដើម្បីថែរក្សាទំនាក់ទំនងប្រពៃណីជាប្រវត្តិសាស្ត្ររវាងប្រទេស និងប្រជាជនយើងទាំងពីរ»។
ក្រសួងការបរទេស និងសហប្រតិបត្តិការអន្តរជាតិ បានដឹងតាមរយៈស្ថានទូតខ្មែរប្រចាំនៅប្រទេសឥណ្ឌា ថា ក្រុមហ៊ុន ម៉ាហាវា ម៉ាន់ឌៀ ត្រាស់ “MAHAVIR MANDIR TRUST” មានគម្រោងសាងសង់ប្រាសាទដោយចម្លងតាមប្រាសាទអង្គរវត្ត។
សេចក្ដីប្រកាសព័ត៌មានរបស់ក្រសួងការបរទេសបញ្ជាក់ថា ទន្ទឹមនឹងគ្នានេះ ភារធារីស្ដីទីស្ថានទូតកម្ពុជា ប្រចាំប្រទេសឥណ្ឌា ក៏បានតវ៉ាបែបនេះ ជាមួយក្រសួងការបរទេសឥណ្ឌាដែរ៕

ប្រភព RFA

Saturday, June 6, 2015