ឥរិយាបថ៥យ៉ាង រាំងខ្ទប់ភាពជោគជ័យក្នុងអាជីពការងាររបស់អ្នក ~ KAS4UAll

ឥរិយាបថ៥យ៉ាង រាំងខ្ទប់ភាពជោគជ័យក្នុងអាជីពការងាររបស់អ្នក

ទីផ្សារការងារបែបសេរី ទាមទារបុគ្គលិកដែលមានសមត្ថភាពខ្ពស់ក្នុងការប្រតិបត្តិការការងារ ដើម្បីភាពជោគជ័យរបស់អង្គភាពអាជីវកម្ម និងភាពជោគជ័យរបស់បុគ្គលផ្ទាល់ផងក្នុងអាជីពការងាររបស់ខ្លួន។ ទោះយ៉ាងនេះក្ដី ត្រឹមតែសមត្ថភាពមួយមុខមិនអាចគ្រប់គ្រាន់ល្មមក្នុងដំណើរដ៏វែងនៃ ការងារនោះទេ តែបុគ្គលអ្នកប្រកួតប្រជែងការងារទាំងអស់ក៏គួរងាកមកមើលចំណុច អវិជ្ជមានមួយចំនួនក្នុងឥរិយាបថការងារប្រចាំថ្ងៃរបស់ខ្លួនផងដែរ ។ ខាងក្រោមនេះ ជាឥរិយាបថទាំង៥ ដែលជាឧបសគ្គចម្បង ដែលតែងយាយីដំណើរឆ្ពោះទៅរកភាពជោគជ័យការងាររបស់អ្នក៖

១) ចូលចិត្តប្រើការប្ដេជ្ញាចិត្តជ្រុលពេក តែមិនប្រើសេចក្ដីក្លាហាន

អ្នក ជំនាញក្នុងវិស័យជំនួញពិភពលោកជាច្រើនរូបអះអាងស្រដៀងគ្នាថា នេះជាសញ្ញាណមិនល្អមួយដែលគ្រប់បុគ្គលប្រកួតប្រជែងការងារទាំង អស់កំពុងតែធ្វើ។ សូម្បីតែលោក Bill Gates ក៏អះអាងដែរថា បុគ្គលិកដែលគាត់ចូលចិត្តប្រើគឺបុគ្គលិកដែលខ្ជិល (គ្មានការប្ដេជ្ញាចិត្តខ្ពស់ពេកទេ) តែពួកគេមានគំនិតបង្កើតភាពងាយស្រួលដល់ការងារ និងពួកគេភាគច្រើនហ៊ានសាកល្បងគំនិតថ្មី ដែលនេះភាពល្អសម្រាប់ជំនួញ។ មួយវិញទៀតអ្នកត្រូវចាំថា ការប្ដេជ្ញាចិត្តរបស់មនុស្សត្រូវតែមានកម្រិត មិនអាចជ្រុលទេ ព្រោះបុគ្គលិក ឬ អ្នកណាក៏ដោយដែលមានការប្ដេជ្ញាចិត្តជ្រុលពេក មិនសូវជាខ្វាយខ្វល់ដល់មនុស្សនៅជុំវិញខ្លួនឡើយ គិតតែពីធ្វើការ និយាយក៏មិនសូវនិយាយ គ្មានទំនាក់ទំនងល្អ។ ទន្ទឹមនឹងនេះនៅក្នុងកន្លែងការងារបើខ្លួនមានត្រឹមតែការប្ដេជ្ញា ចិត្តហួសហេតុ ហើយអនុវត្តតែឯកឯងនោះ សកម្មភាពនេះមិនអាចធ្វើឲ្យអង្គភាពខ្លួនមួយរីកចម្រើនបានឡើយ។

២) មិនបើកចិត្តទទួលយកគំនិត

ក្នុង ខណៈដែលទីផ្សារការងារកំពុងប្រកួតប្រជែងបែបនេះ បុគ្គលដែលប្រកាន់គំនិតអញនិយម មិនផ្លាស់ប្ដូរ ស្វែងរកគំនិតថ្មីៗទេនោះ មិនអាចជោគជ័យក្នុងអាជីពការងារទេ។ ការងារដែលជោគជ័យ លុះត្រាតែបុគ្គលអ្នកប្រតិបត្តិការការងារ នោះបើកចិត្តឲ្យទូលាយ ផ្លាស់ប្ដូរ ស្វែងរកគំនិតថ្មីៗកាន់តែច្រើន ជាពិសេសរៀនសូត្រពីអ្នកដទៃតែម្ដង។ រាល់គំនិតអ្នកដទៃ ជុំវិញខ្លួនអ្នក ទោះអាក្រក់ក្ដី ឬល្អ សុទ្ធតែ ជាផ្លូវសម្រាប់ឆ្ពោះទៅកាន់ជោគជ័យ ព្រោះវានឹងប្រាប់អ្នកថា ផ្លូវណាគួរទៅ ផ្លូវណាមិនគួរទៅ ដូច្នេះអ្នកគ្រាន់តែធ្វើខ្លួនជាមនុស្សចិត្តទូលាយបន្តិច ប្ដូរពីគំនិតបែបអញនិយម មកគំនិតចែករំលែក នោះការងាររបស់នឹងល្អប្រសើរមិនខាន។

៣) មានគំនិតព្រួយបារម្ភពីការងារថ្មីខ្លាំងពេក

ការងារ ទាមទា ការខិតខំប្រឹងប្រែង និងគំនិតច្នៃប្រឌិត តែមិនទាមទា ការភ័យព្រួយ ឬបារម្ភច្រើនពេកទេ។ បុគ្គលដែលចូលចិត្តព្រួយបារម្ភលើការងារថ្មីមិនទាន់មកដល់ជាជាង ការងារជាក់ស្ដែងរបស់ខ្លួន គឺនឹងធ្វើឲ្យការងារកាន់តែអួអាប់ លទ្ធភាពការងារចាស់កាន់តែធ្លាក់ចុះ គំនិតថ្មីគិតលែងចេញ។ នេះ ជាសញ្ញាណបរាជ័យធ្ងន់ក្នុងអាជីពការងារ។ មនុស្សដែលចូលចិត្តគិតតែពីការងារថ្មី មិនសូវចាប់អារម្មណ៍ ឬ បំពេញការងារបច្ចុប្បន្នឲ្យបានគ្រប់ជ្រុងជ្រោយចប់ចុងចប់ដើមនោះដែរ ដូច្នេះអ្នកនឹងខ្វះចន្លោះគ្រប់បែបយ៉ាង។

៤) ប្រកាន់គំនិតមេនិយម ឬអែបអប

មិន ថា ដំណែងអ្នកជាអ្វីទេ តែប្រសិនបើភ្លាត់ស្នៀត អ្នកក៏នឹងប្រឈមភាពបរាជ័យដូចគ្នា។ ក្នុងសម័យកាលប្រើសមត្ថភាពនេះ បុគ្គលដែលចូលចិត្ត ធ្វើអ្វីដើម្បីតែផ្គាប់ផ្គុនចៅហ្វាយនាយ ឬអែបអបថ្នាក់លើ ហើយភ្លេចគិតពីមនុស្សនៅជុំវិញខ្លួន ដែលមានឋានៈទាបជាងខ្លួន និងដែលកំពុងនៅក្បែរខ្លួននោះ ជាបុគ្គលដែលកំពុងប្រឈមនឹងចំណុចគ្រោះថ្នាក់មួយ។ ទង្វើនិយមចៅហ្វាយនាយជ្រុល នឹងធ្វើឲ្យមនុស្សជុំវិញខ្លួនមិនសប្បាយចិត្ត លែងរាប់រក លែងស្ដាប់បង្គាប់ និងឲ្យតម្លៃទាប ហើយចៅហ្វាយនាយក៏មិនសប្បាយចិត្តដូចគ្នា បើសិនជាដឹងថា យើងមិនប្រើសមត្ថភាពធ្វើការឲ្យអង្គភាពរីកចម្រើន តែបែរមកយកចិត្តតែលើបុគ្គលនោះ។ ជាការពិត ម្ចាស់ក្រុមហ៊ុនមិនត្រូវការ បុគ្គលិកដែលធ្វើការឲ្យតែបុគ្គលខ្លួនទេ តែគេត្រូវបុគ្គលិកគ្រប់ថ្នាក់ដែលធ្វើការដើម្បីភាពរីកចម្រើន របស់ក្រុមហ៊ុនគេ។

៥) ទម្លាប់អូសបន្លាយពេល

ប្រសិន ជាពេលវេលាត្រូវបានអូសបន្លាយកាន់តែយូរឡើង ភាពរីកចម្រើនរបស់អង្គភាពអាជីវកម្មមួយកាន់តែខើច ដូច្នេះបុគ្គលដែលចេះវាយតម្លៃលើពេលវេលាល្អ និងមិនប្រកាន់គំនិតអូសបន្លាយពេលនោះ អាចរកលាភបានច្រើន និងបានមុនគេ ហើយក៏នឹងសាងស្នាដៃបានល្អសម្រាប់អាជីពការងាររបស់ខ្លួនផងដែរ។

ប្រភព Kqube

Saturday, June 6, 2015