លោក ហ៊ុន សែន រិះគន់បក្សនយោបាយដែលសន្យាដំឡើងប្រាក់ខែខ្ពស់ដល់មន្ត្រីរាជការ ~ KAS4UAll

លោក ហ៊ុន សែន រិះគន់បក្សនយោបាយដែលសន្យាដំឡើងប្រាក់ខែខ្ពស់ដល់មន្ត្រីរាជការ

លោកនាយករដ្ឋមន្ត្រី ហ៊ុន សែន ថ្លែងក្នុងពិធីសម្ពោធដាក់ឲ្យប្រើប្រាស់ស្ពានមិត្តភាពកម្ពុជា-ចិន នាខេត្តស្ទឹងត្រែង នៅថ្ងៃទី១ ខែមេសា ឆ្នាំ២០១៥។

RFA/Brach Chev

លោកនាយករដ្ឋមន្ត្រី ហ៊ុន សែន ថ្លែងរិះគន់គណបក្សនយោបាយណាដែលមានគោលនយោបាយដំឡើងប្រាក់ខែខ្ពស់ ឲ្យមន្ត្រីរាជការ។ ផ្ទុយពីការលើកឡើងនេះ មន្ត្រីជាន់ខ្ពស់គណបក្សប្រឆាំងលើកឡើងថា ការដំឡើងប្រាក់ខែដល់មន្ត្រីរាជការ អាចធ្វើបានដោយរឹតបន្តឹងការប្រមូលពន្ធ និងទប់ស្កាត់ការចាយលុយរដ្ឋខុសទំនង។
រឿងដំឡើងប្រាក់ខែមន្ត្រីរាជការខ្ពស់លើសពីអ្វីដែលរដ្ឋាភិបាល សព្វថ្ងៃធ្វើមិនទាន់បាននោះ ជាសារនយោបាយដែលប្រមុខរដ្ឋាភិបាលថ្លែងរិះគន់គូប្រកួតរបស់ខ្លួន ក្នុងពិធីសម្ពោធដាក់ឲ្យប្រើប្រាស់ផ្លូវជាតិលេខ៤១ នាខេត្តកំពង់ស្ពឺ នៅថ្ងៃទី២ ខែមិថុនា។
លោកនាយករដ្ឋមន្ត្រី ហ៊ុន សែន ថ្លែងថា នៅពេលគណបក្សនយោបាយណាចង់ឈ្នះឆ្នោត គេតែងតែសន្យាដំឡើងប្រាក់ឈ្នួលមន្ត្រីរាជការ ប៉ុន្តែគេមិនគិតថា ការដំឡើងប្រាក់ខែខ្ពស់នេះ នឹងបាត់បង់ថវិកាជាតិដែលត្រូវយកទៅចំណាយលើការផ្គត់ផ្គង់លើបញ្ហា ផ្សេងៗនោះទេ៖ «ខ្ញុំចង់តែដំឡើងប្រាក់ខែមន្ត្រីរាជការម្នាក់ ៥០០លានរៀល ប៉ុន្តែយើងទៅរកលុយនៅណា?»។
លោកនាយករដ្ឋមន្ត្រីបន្តថា ប្រសិនបើមានការដំឡើងប្រាក់ខែខ្ពស់នេះពិតមែន លុះត្រាត្រូវតែយកពន្ធលើដីស្រែរបស់ប្រជាកសិករ។
ទោះថ្លែងមិនចំឈ្មោះគណបក្សណាក្តី ប៉ុន្តែគណបក្សសង្គ្រោះជាតិ ដែលជាគូប្រកួតប្រជែងដ៏ស្វិតស្វាញរបស់គណបក្សប្រជាជនកម្ពុជា និងជាគណបក្សមួយដែលមានគោលនយោបាយមួយក្នុងចំណោមគោលនយោបាយ ៧ចំណុច គណបក្សនេះបានអះអាងពីការដំឡើងប្រាក់ខែគ្រូបង្រៀន ប៉ូលិស ទាហាន មន្ត្រីរាជការ ឲ្យបាន ១លានរៀលក្នុងមួយខែ។
មន្ត្រីជាន់ខ្ពស់គណបក្សសង្គ្រោះជាតិ លោក សុន ឆ័យ និយាយថា ការដំឡើងប្រាក់ខែមន្ត្រីរាជការពុំចាំបាច់កាត់លុយប្រើប្រាស់គ្រឿង បរិក្ខារ ផ្លូវ សាលារៀន ឬត្រូវយកពន្ធលើដីស្រែទេ គឺគ្រាន់តែអនុវត្តការប្រមូលពន្ធឲ្យត្រឹមត្រូវតាមច្បាប់ នោះគឺអាចធ្វើទៅបានហើយ។
លោកបន្តទៀតថា ការចាយខ្ជះខ្ជាយខុសគោលការណ៍ ធ្វើឲ្យបាត់បង់ចំណូលនៃថវិកាជាតិសរុបជិត ៣០ភាគរយ។ លោក សុន ឆ័យ បន្តថា ការថ្លែងដូច្នេះរបស់លោកនាយករដ្ឋមន្ត្រី ហ៊ុន សែន ប្រហែលជាលោកមិនបានដឹងការពិតពីការប្រមូលពន្ធនោះទេ៖ «គណបក្ស សង្គ្រោះជាតិ មិនដែលទាមទារឲ្យដំឡើងពន្ធទេ ប៉ុន្តែយើងទាមទារឲ្យមានការប្រមូលឲ្យបានត្រឹមត្រូវ។ លោកនាយករដ្ឋមន្ត្រី និយាយដូចនេះ ប្រហែលគាត់មិនបានដឹងអ្វីជាស្ថានភាពហិរញ្ញវត្ថុទេ»។
ថ្លែងមិនខុសគ្នាប៉ុន្មានពីលោក សុន ឆ័យ ឡើយ អ្នកវិភាគសេដ្ឋកិច្ចឯករាជ្យ លោក ស្រី ចន្ធី យល់ថា រដ្ឋាភិបាលមានលទ្ធភាពគ្រប់គ្រាន់ដើម្បីដំឡើងប្រាក់ខែជូន មន្ត្រីរាជការដោយពុំចាប់កាត់បន្ថយលើការចំណាយផ្សេងៗនោះទេ។ លោកបន្តទៀតថា កន្លងមក ការប្រមូលពន្ធរបស់រដ្ឋាភិបាលមានភាពខ្វះចន្លោះច្រើនដែលធ្វើឲ្យ បាត់ចំណូលជាតិ៖ «ខ្ញុំជឿថា អាចធ្វើបាន មិនដល់ថ្នាក់កាត់បន្ថយមន្ទីរពេទ្យ សាលារៀនទេ។ យើងអាចពិនិត្យមើលចំនួនមន្ត្រីរាជការ បើច្រើនអាចកាត់បន្ថយ គឺមានន័យ បើគាត់ដល់អាយុចូលនិវត្ត ឲ្យគាត់ឈប់ហើយផ្ដល់ប្រាក់អត្ថប្រយោជន៍ជូនគាត់ទៅ»។
ទោះជាលោកនាយករដ្ឋមន្ត្រីរិះគន់លើគោលនយោបាយនៃការដំឡើងប្រាក់ខែ របស់បក្សនយោបាយពេលឃោសនាបោះឆ្នោតនោះក្តី ក៏រដ្ឋាភិបាលសព្វថ្ងៃដែលដឹកនាំដោយគណបក្សប្រជាជនកម្ពុជា កំពុងតែដំឡើងប្រាក់ឈ្នួលជូនកម្មករ កម្មការិនី គ្រូបង្រៀន មន្ត្រី ទាហានជាដើមបានតិចតួចដែរ។ ប៉ុន្តែមិនបានច្រើនដូចអ្វីដែលគណបក្សសង្គ្រោះជាតិ សន្យាអនុវត្តនៅពេលដែលខ្លួនជាប់ឆ្នោតដឹកនាំរដ្ឋាភិបាលនោះទេ៕

ស្ដាប់ ឬ ទាញយកសំឡេង

ប្រភព RFA

Saturday, June 6, 2015