លោក សម រង្ស៊ី ត្រៀមយកបញ្ហាអន្តោប្រវេសន៍ ព្រំដែន និងព្រៃឈើ ទៅនិយាយជាមួយលោក ហ៊ុន សែន ~ KAS4UAll

លោក សម រង្ស៊ី ត្រៀមយកបញ្ហាអន្តោប្រវេសន៍ ព្រំដែន និងព្រៃឈើ ទៅនិយាយជាមួយលោក ហ៊ុន សែន

ប្រធាន គណបក្សសង្គ្រោះជាតិ លោក សម រង្ស៊ីត្រៀមលើកយកបញ្ហាព្រំដែន ជនអន្តោប្រវេសន៍ខុសច្បាប់ និងបញ្ហាព្រៃឈើ យកទៅពិភាក្សាគ្នាជាមួយដៃគូរសន្ទនាលោកនាយករដ្ឋមន្ត្រី ហ៊ុន សែន នៅពេលលោកត្រឡប់មកកាន់ប្រទេសកម្ពុជាវិញ។

បើទោះជាមិនទាន់មានឱកាសច្រើនជួបពិភាក្សាជាមួយលោក ហ៊ុន សែន ក៏ដោយ តែលោក សម រង្ស៊ី បានត្រៀមខ្លួនរួចជាស្រេចក្នុងការលើកយកបញ្ហារបស់ប្រជាពលរដ្ឋ ដូចជា បញ្ហាបូរណភាពទឹកដី បញ្ហាកសិករបាត់បង់ដីធ្លី បញ្ហាកសិកដែលលក់ផលិតផលខាត ប៉ះពាល់ដល់ជីវភាពរស់នៅ ក៏ត្រូវលើកយកពិភាក្សាជាមួយលោក ហ៊ុន សែន ដែរ។

ក្នុងវីដេអូឃ្លីបជាង៦នាទីជួបអ្នកគាំទ្ររបស់ខ្លួននៅទីក្រុងឡូវែល (Lowell) សហរដ្ឋអាមេរិក កាលពីថ្ងៃទី២៤ ខែឧសភាឆ្នាំ២០១៥ ដែលទើបបង្ហោះនៅលើហ្វេសបុកខ្លួនកាលពីពេលថ្មីៗនេះ លោក សម រង្ស៊ី បញ្ជាក់យ៉ាងដូច្នេះថា«អ្វីដែលជាទុកកង្វល់ អ្វីដែលជាការឈឺចាប់ អ្វីដែលជាការព្រួយបារម្ភរបស់ប្រជារាស្ត្រខ្មែរ នេះហើយជាប្រធានបទនៃវប្បធម៌សន្ទនា។ ខ្ញុំមិនទាន់មានឱកាសច្រើនលើសលុបទេ ប៉ុន្តែពេលណាដែលមានឱកាសនិយាយជួបជាមួយថ្នាក់ដឹកនាំគណបក្សប្រជាជនគឺ លើកពីបញ្ហាព្រំដែន បញ្ហាបូរណភាពទឹកដី បញ្ហាអន្តោប្រវេសន៍ បញ្ហាព្រៃឈើ បញ្ហាទ្រព្យសម្បត្តិជាតិ ទ្រព្យសម្បត្តិធម្មជាតិ ដែលយើងបាត់បង់ ដែលយើងព្រួយបារម្ភថានឹងរលាយសាបសូន្យ ក៏យើងនឹងការពារឲ្យបានត្រឹមត្រូវ»។

ជាមួយគ្នានេះលោក សម រង្ស៊ី នៅតែបញ្ជាក់ថា វប្បធម៌សន្ទនានេះ គឺអាចជួយដោះស្រាយបញ្ហាជូនប្រជាពលរដ្ឋនិងប្រទេសជាតិបាន តែមិនមែនមានន័យថា រូបលោកឈប់រិះគន់ ឬបើកដៃឲ្យគណបក្សកាន់អំណាចធ្វើអ្វីតាមតែចិត្តនោះទេ៕

ប្រភព ThmeyThmey

Saturday, June 6, 2015