ក្រុមហ៊ុនយក្ស Facebook បើកឲ្យប្រើប្រាស់ Video call បាន (វីដេអូ) ~ KAS4UAll

ក្រុមហ៊ុនយក្ស Facebook បើកឲ្យប្រើប្រាស់ Video call បាន (វីដេអូ)

ដោយសារតែ Facebook កំពុងតែទទួលបានការពេញនិយមយ៉ាងខ្លាំងពីសំណាក់យុវវ័យជុំវិញ ពិភពលោក ដូចនេះក្រុមហ៊ុន តែងតែខំប្រឹងរិះរកអ្វីដែលថ្មី ដើម្បីទាក់ទាញចំណាប់អារម្មណ៍អ្នកប្រើ ដូចជាកាលពីឆ្នាំ២០១៣កន្លងទៅនេះ Messenger របស់ Facebook បានវិវត្តន៍ខ្លួនម្ដងរួមមកហើយ ដោយដាក់ឲ្យដំណើរការប្រព័ន្ធខលជាសំឡេង ហើយពេលថ្មីៗនេះ ក្រុមហ៊ុន Facebook ទើបតែដាក់ឲ្យដំណើរការមុខងារថ្មីពិសេសរបស់ខ្លួនក្នុងកម្មវិធី Messenger ដដែល នោះគឺ ខលហើយមើលមុខគ្នាឃើញ (Video call) ។

មុខងារ នេះ អាចឲ្យយើងប្រើបានទាំងកាមេរ៉ាមុខ និងកាមេរ៉ាក្រោយតាមតែសេចក្ដីត្រូវការរបស់យើង វាប្រៀបដូចយើងប្រើកម្មវិធី Skype ដូច្នេះដែរ តែទាស់មួយត្រង់ថា Messenger មានមុខងារមួយលើសកម្មវិធី Skype នោះគឺ Messenger អនុញ្ញាតឲ្យយើងផ្ទេរប្រាក់ពីម្ខាងទៅម្ខាងបាន ។ មកទល់ពេលនេះ ក្រុមហ៊ុន Facebook បានអះអាងថា កម្មវិធី Messenger របស់ខ្លួន មានអ្នកប្រើជាង៦០០លាននាក់ជាប្រចាំខែ ។

គួរបញ្ជាក់ថា បច្ចុប្បន្ននេះ មុខងារថ្មីនេះត្រូវបានគេដាក់ឲ្យប្រើបានតែប៉ុន្មានប្រទេសប៉ុណ្ណោះ ដូចជា Belgium, Canada, Croatia, Denmark, France, Greece, Ireland, Laos, Lithuania, Mexico, Nigeria, Norway, Oman, Poland, Portugal, the UK, the US and Uruguay ដោយឡែកប្រទេសផ្សេងវិញ នឹងទទួលបានមុខងារពិសេសនេះប្រើតាមក្រោយ ។

ប្រភព Kqube

Monday, June 22, 2015