វប្បធម៌សន្ទនាធ្វើអោយ CPP ចំណេញច្រើនជាង CNRP ~ KAS4UAll

វប្បធម៌សន្ទនាធ្វើអោយ CPP ចំណេញច្រើនជាង CNRP

ភ្នំពេញ៖ លោក ហ៊ុន សែន អនុប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃព្រះរាជណាចក្រកម្ពុជា និងលោក សម រង្ស៊ី ប្រធានគណបក្សសង្គ្រោះជាតិ បានសម្រេចចិត្តបង្កើតវប្បធម៌សន្ទនា។ វប្បធម៌សន្ទនានេះ មានគោលដៅដោះស្រាយបញ្ហាប្រទេសជាតិមួយចំនួនដោយសន្តិវិធី និងចៀសវាងអំពើហិង្សាពាក្យសម្តី ឬហិង្សាផ្នែកកម្លាំងកាយ។ សម្រាប់គណបក្សទាំងពីរ វប្បធម៌សន្ទនា គឺជាមធ្យោបាយល្អ ក្នុងការដោះស្រាយបញ្ហាជាតិមួយចំនួនធំ។ ប៉ុន្តែ អ្នកវិភាគមើលឃើញថា វប្បធម៌សន្ទនានេះបានធ្វើអោយគណបក្ស CPP ចំណេញច្រើនជាង CNRP។

លោក កែម ឡី អ្នកវិភាគឯករាជ្យ បានអត្ថាធិប្បាយនៅសៅរ៍នេះថា នៅក្នុងគណបក្សប្រឆាំង មានអ្នកគាំទ្របីប្រភេទ។ ទី១ អ្នកប្រឆាំងខ្លាំង។ ទី២ អ្នកប្រឆាំងល្មម និងទី៣អ្នកគាំទ្រនយោបាយរបស់មេដឹកនាំតែម្តង។ ដូច្នេះ វប្បធម៌សន្ទនានេះ ធ្វើអោយគណបក្សសង្គ្រោះជាតិបាត់បង់អ្នកគាំទ្រដែលមានគំនិតជ្រុលនិយម។

លោក កែម ឡី បានបន្តទៀតថា គណបក្សសង្គ្រោះជាតិទទួលបានកៅអីច្រើននៅអាណត្តិឆ្នាំ២០១៣កន្លងមក គឺដោយសារការរិះគន់ប្រឆាំងនឹងគណបក្សប្រជាជនកម្ពុជាជាចំហរ។ តែបើវប្បធម៌សន្ទនា ធ្វើអោយគណបក្សសង្គ្រោះជាតិលែងហ៊ាននិយាយ ហើយបញ្ហាមួយចំនួននៅតែដោះស្រាយមិនបាន ពេលនោះ គណបក្សសង្គ្រោះជាតិ គឺជាអ្នកខាត។

ងាកមកលោក អ៊ូ វីរៈ អ្នកវិភាគឯករាជ្យម្នាក់ទៀតវិញ លោកក៏គិតឃើញដូចលោក កែម ឡី ដែរ។ លោកថា គណបក្សប្រជាជនកម្ពុជា គឺជាអ្នកចំណេញច្រើនជាង នៅក្នុងការការសម្របសម្រួលអោយមានវប្បធម៌សន្ទនានេះ។ គណបក្សសង្គ្រោះជាតិខាត ពីព្រោះ គណបក្សប្រឆាំងមិនអាចធ្វើសកម្មភាពរិះគន់ខ្លាំងក្លាជាសាធារណៈដោយសារ វប្បធម៌សន្ទនា។

សម្រាប់អ្នកជំនួញមួយចំនួនវិញ បើទោះបីជាមានបក្សខ្លះខាត ឬចំណេញផ្នែកនយោបាយក៏ដោយមែន។ តែវប្បធម៌សន្ទនានេះអាចរក្សាអោយមានស្ថិរភាពនយោបាយ។ មានស្ថិរភាពនយោបាយ ទើបមានការវិនិយោគ មានការវិនិយោគ ទើបមានការអភិវឌ្ឍន៍៕

ប្រភព ThmeyThmey

Saturday, June 6, 2015