សេចក្ដីព្រាងច្បាប់NGO នឹងបញ្ជូនទៅរដ្ឋសភាសប្ដាហ៍ក្រោយ បន្ទាប់ពីរដ្ឋាភិបាលអនុម័ត ~ KAS4UAll

សេចក្ដីព្រាងច្បាប់NGO នឹងបញ្ជូនទៅរដ្ឋសភាសប្ដាហ៍ក្រោយ បន្ទាប់ពីរដ្ឋាភិបាលអនុម័ត

រដ្ឋាភិបាល បានអនុម័ត សេចក្ដីព្រាងច្បាប់ស្ដីពី សមាគម និងអង្គការមិនមែនរដ្ឋាភិបាលហើយ នៅព្រឹកថ្ងៃទី៥ មិថុនានេះ ក្រោមការដឹកនាំដោយលោកនាយករដ្ឋមន្ត្រី ហ៊ុន សែន នាទីស្តីការគណៈរដ្ឋមន្ត្រី។ ហើយសេចក្ដីព្រាងច្បាប់នេះ នឹងត្រូវបញ្ជូនទៅរដ្ឋសភា នាសប្តាហ៍ក្រោយ។

នៅលើគេហទំព័រហ្វេសបុករបស់លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី បានសរសេរថា រដ្ឋាភិបាលសម្រេចអនុម័តទៅលើសេចក្តីព្រាងច្បាប់ស្តីពី សមាគម និងអង្គការមិនមែនរដ្ឋាភិបាល ដោយក្នុងនោះមានការកែសម្រួលពាក្យពេជន៍មួយចំនួន និងលុបចោលមាត្រាចំនួន២ ជាការសំណូមពរពីលោកនាយករដ្ឋមន្ត្រី ហ៊ុន សែន ដែលមានការគាំទ្រពីគណៈរដ្ឋមន្ត្រី។

សេចក្ដីព្រាងច្បាប់ស្ដីពី សមាគម និងអង្គការមិនមែនរដ្ឋាភិបាល ដែលរដ្ឋាភិបាលអនុម័តនេះគឺមាន០៩ជំពូក និង៣៩មាត្រា ក្រោយពីលុបចោលចំនួន២មាត្រា។ ហើយសេចក្ដីព្រាងច្បាប់នេះ នឹងបញ្ជូនទៅរដ្ឋសភា នាដើមសប្តាហ៍ក្រោយនេះ ។

លោក ផៃ ស៊ីផាន បានសរសេរថា គិតមកដល់ពេលនេះ គឺអស់រយៈពេល២០ឆ្នាំកន្លងមកហើយ ដែលរាជរដ្ឋាភិបាល ក៏ដូចជាគណបក្សភាគតិចនៅក្នុងសភា បានពិចារណាលើសេចក្ដីព្រាងច្បាប់ ស្ដីពី សមាគម និងអង្គការមិនមែនរដ្ឋាភិបាលនេះ។ លោកថា ទិសដៅ និងគោលបំណងនៃសេចក្ដីព្រាងច្បាប់នេះ អនុលោមតាមរដ្ឋធម្មនុញ្ញ ។ សេចក្ដីប្រកាសជាសកលស្ដីពីសិទ្ធមនុស្ស និងកតិកាសញ្ញាអន្តរជាតិ ស្ដីពីសិទ្ធប្រជាពលរដ្ឋ និងសិទ្ធនយោបាយ ។

សេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលដ៏ចម្រូងចម្រាស ត្រូវបានរាជរដ្ឋាភិបាល អះអាងថា បង្កើតឡើងដើម្បីលើកស្ទួយការប្រើប្រាស់សិទ្ធិសេរីភាព ក្នុងការបង្កើត សមាគម និងអង្គការមិនមែនរដ្ឋាភិបាល និងលើកកម្ពស់កិច្ចប្រតិបត្តិការជាមួយអង្គការសង្គមស៊ីវិលលើគ្រប់ វិស័យ។ តែយ៉ាងណាអង្គការសង្គមស៊ីវិលជាតិ និងអន្តរជាតិ កន្លងមក ក៏ស្នើឲ្យរដ្ឋសភា បើកកិច្ចពិគ្រោះយោបល់ដោយចំហរជាមុនសិនទៅលើសេចក្ដីព្រាងច្បាប់នេះ មុននឹងសភាអនុម័ត៕

ប្រភព ThmeyThmey

Saturday, June 6, 2015