ព្រឹត្តិការណ៍ដណ្ដើមរាជ្យពីសំណាក់កូនប្រសារបស់ព្រះបាទជ័យវរ្ម័នទី៨ (ភាគ១៨) ~ KAS4UAll

ព្រឹត្តិការណ៍ដណ្ដើមរាជ្យពីសំណាក់កូនប្រសារបស់ព្រះបាទជ័យវរ្ម័នទី៨ (ភាគ១៨)

ព្រឹត្តិការណ៍ឃោរឃៅដណ្ដើមរាជពីសំណាក់កូនប្រសា ត្រូវបានកត់ត្រាទុកដោយសមាជិកអ្នកការទូតចិន ម្នាក់ ដែលបានមកប្រទេសកម្ពុជា នៅចុងសតវត្សទី១៣។

ក២៥. ព្រះបាទស្រីន្ទ្រវរ្ម័ន រឺឥន្ទ្រវរ្ម័នទី៣ (ឆ្នាំ១២៩៥-ឆ្នាំ១៣០៧)

ព្រឹត្តិការណ៍មួយដែលកើតឡើងនៅឆ្នាំ១២៩៥ ក៏ដោយសារព្រះរាជបុត្រីព្រះអង្គព្រះនាម ស្រិន្ទ្រភូបេ សូរចូឌា បានលួចព្រះខ័នមាសដែលជាតំណាងអំណាចព្រះរាជា យកទៅអោយស្វាមីនាង បានបង្ខំអោយព្រះបាទជ័យវរ្ម័នទី៨ ជាព្រះបិតាចុះចេញពីរាជបល្ល័ង្គ ហើយប្រគល់រាជ្យនេះទៅអោយព្រះបាទស្រិន្ទ្រវរ្ម័ន ឬឥន្ទ្រវរ្ម័នទី៣ ជាកូនប្រសាសោយរាជ្យស្នងព្រះអង្គក្នុងឆ្នាំនោះ។

សមាជិកអ្នកការទូតចិន ម្នាក់ របស់ព្រះចៅអធិរាជតេមូ ដែលបានមកដល់កម្ពុជា ក្នុងឆ្នាំ១២៩៦ ឈ្មោះ ជូតាក្វាន់ ក៏បានផ្តល់សក្ខីកម្មចំពោះព្រឹត្តិការណ៍នេះដែរ។ លោកបានសរសេរបញ្ជាក់ថា ការផ្លាស់ប្ដូររជ្ជកាលនេះមានភាពឃោរឃៅ គឺស្ដេចដែលឡើងសោយរាជ្យថ្មីជាកូនប្រសារបស់ស្ដេចមុន។

លោកបន្តថា កូនស្រីរបស់ស្ដេចអង្គនេះ បានលួចយកព្រះខ័នមាសរបស់ព្រះបិតា ទៅអោយស្វាមីនាង។

លោក ជូតាក្វាន់ បានអះអាងថា កូនប្រុសរបស់ព្រះបាទជ័យវរ្ម័នទី៨ ដែលត្រូវទទួលរាជ្យបន្តពីព្រះបិតា ទ្រង់មិនទទួលយកស្ដេចថ្មីដណ្ដើមរាជ្យនេះទេ ហើយបានចេញពីព្រះបរមរាជវាំង ដើម្បីទៅកេណ្ឌទ័ព។ ស្ដេចថ្មីចាប់បាន ក៏យកទៅកាត់ម្រាមជើងចោល និងយកទៅឃុំទុកក្នុងបន្ទប់ងងឹត។

ព្រះបាទស្រិន្ទ្រវរ្ម័ន ឬឥន្ទ្រវរ្ម័នទី៣ ជាព្រះមហាក្សត្រដែលជឿ និងគោរពព្រះពុទ្ធសាសនាហីនយាន ហើយគឺជាព្រះមហាក្សត្រខ្មែរដំបូង ដែលបានកសាងសិលាចារឹកជាភាសាបាលី (ភាសាសក្ការៈខាងព្រះពុទ្ធសាសនា) ជំនួសភាសាសំស្ក្រឹត ភាសានៃសាសនាព្រាហ្មណ៍នៅប្រទេសកម្ពុជា នេះ។

នៅក្នុងរាជ្យព្រះអង្គ ប្រទេសខ្មែរទទួលបានសុខសន្តិភាពណាស់។ ថ្វីត្បិតតែព្រះអង្គទ្រង់គោរពព្រះពុទ្ធសាសនា ប៉ុន្តែព្រហ្មញ្ញសាសនាក៏បានទទួលការឧបត្ថម្ភពីព្រះអង្គ ហើយមានភាពរុងរឿងផងដែរ។ នៅឆ្នាំ១៣០៧ ព្រះបាទស្រិន្ទ្រវរ្ម័ន ឬឥន្ទ្រវរ្ម័នទី៣ បានដាក់រាជ្យ ហើយផ្ទេររាជ្យសម្បត្តិថ្វាយទៅរជ្ជទាយាទយុវរាជ ក្នុងឆ្នាំនោះ។ រួចព្រះអង្គទ្រង់យាងទៅគង់នៅក្នុងអាស្រមព្រះពុទ្ធសាសនាមួយយ៉ាង ស្ងាត់ស្ងៀមនៅក្នុងព្រៃ។

ក.២៦ ព្រះបាទស្រិន្ទ្រជ័យវរ្ម័ន ឬឥន្ទ្រជ័យវរ្ម័ន (ឆ្នាំ១៣០៨-ឆ្នាំ១៣២៧)

ក្រោយពីព្រះបាទឥន្ទ្រវរ្ម័នទី៣ ដាក់រាជ្យ ហើយយាងទៅគង់យ៉ាងស្ងាត់ស្ងៀមក្នុងព្រៃ ព្រះបាទស្រិន្ទ្រជ័យវរ្ម័ន ឬឥន្ទ្រជ័យវរ្ម័ន ដែលជាព្រះញាតិ ទ្រង់ឡើងសោយរាជ្យស្នងព្រះអង្គ។ ដោយព្រះអង្គមានជំនឿលើសាសនាព្រះឥសូរយ៉ាងមោះមុត ផ្ទុយពីរាជ្យមុនព្រះអង្គនោះ ព្រះបាទឥន្ទ្រជ័យវរ្ម័ន បានខំស្ដារចាត់ចែងតុបតែងបន្ថែមនូវប្រាសាទខាងព្រហ្មញ្ញសាសនា ដែលបានកសាងឡើងក្នុងរជ្ជកាលរបស់ព្រះបាទជ័យវរ្ម័នទី៨ ឧទ្ទិសចំពោះព្រាហ្មណ៍ជ័យមង្គលាថ ហើយព្រះអង្គដែលមានគំនិតប្រឆាំងនឹងព្រះពុទ្ធសាសនា បានជួយគាំទ្រប្រតិកម្មរបស់អ្នកកាន់ព្រហ្មញ្ញសាសនា អោយវាយបំផ្លាញបដិមាផ្សេងៗខាងព្រះពុទ្ធសាសនា ដែលជាហេតុបណ្ដាលអោយមានការបះបោរ កើតជម្លោះទាស់តែងផ្ទៃក្នុងរវាងខ្មែរ និងខ្មែរ ពីរឿងសាសនានេះថែមទៀតផង។ ឆ្លៀតឱកាសដ៏ល្អនេះ ជនជាតិថៃ ដោយយកលេសថាការពារជំនឿព្រះពុទ្ធសាសនា បានឆ្លៀតឱកាសលុកលុយប្រទេសកម្ពុជា រហូតដល់ប្រទេសចំប៉ា ថែមទៀតផង។

ក្នុងរាជ្យរបស់ព្រះអង្គ គឺនៅឆ្នាំ១៣២០ គណៈបេសកកម្មចិន មួយត្រូវបានបញ្ជូនមក ដើម្បីទិញដំរីផ្សាំងពីប្រទេសខ្មែរ។ ព្រះបាទឥន្ទ្រជ័យវរ្ម័ន ទ្រង់ឡើងសោយរាជ្យពីឆ្នាំ១៣០៧ ឬឆ្នាំ១៣០៨ ហើយគង់ក្នុងរាជ្យរហូតដល់ឆ្នាំ១៣២៧ នៃគ្រិស្ដសករាជ។

ក.២៧ ព្រះបាទជ័យវរ្ម័នទី៩ (ឆ្នាំ១៣២៧-ឆ្នាំ១៣៣៦)

បន្ទាប់ពីរាជ្យរបស់ព្រះបាទឥន្ទ្រជ័យវរ្ម័ន ព្រះរាជបុត្ររបស់ព្រះអង្គព្រះនាម សីហនុ បានឡើងគ្រងរាជ្យស្នង ដោយមានព្រះនាមក្នុងរាជ្យថា ព្រះបាទជ័យវរ្ម័នទី៩ នៅក្នុងឆ្នាំ១៣២៧ នៃគ្រិស្ដសករាជ។ គេមិនបានដឹងច្បាស់ពីរយៈកាលគ្រងរាជ្យរបស់ព្រះបាទជ័យវរ្ម័នទី៩ នៅអង្គរពិតប្រាកដទេ តែគេអាចដឹងបានថា គឺព្រះបាទជ័យវរ្ម័នទី៩ នេះហើយ ដែលបញ្ជូនទូតទៅប្រទេសចិន នៅឆ្នាំ១៣៣០ និងបានចាត់គណៈប្រតិភូមួយ អោយទៅធ្វើវន្ទនកិច្ចចំពោះប្រទេសដៃវៀត នៅច្រកភ្នំកឿវ៉ៅ នៅឆ្នាំ១៣៣៥ នៃគ្រិស្ដសករាជ។

ព្រះបាទជ័យវរ្ម័នទី៩ ជាព្រះមហាក្សត្រចុងក្រោយបង្អស់ដែលគេស្គាល់តាមសិលាចារឹក ហើយគឺប្រហែលជាព្រះរាជាខ្មែរសម័យអង្គរចុងក្រោយបង្អស់ ដែលទ្រង់យកព្រះនាមវរ្ម័ន មកប្រើនេះផងដែរ។ ព្រះមហាក្សត្រអង្គនេះ ក៏ទ្រង់ជាព្រះរាជាមានជំនឿមុតមាំបំផុតលើសាសនាព្រះឥសូរ។ ក្នុងបំណងបង្ហាញអោយឃើញជាសាធារណៈនូវជំនឿនេះ ព្រះអង្គបានទ្រង់ចាត់ចែងអោយសាងសិលាចារឹកមួយ ដាក់តម្កល់ក្នុងបូជនីយដ្ឋានព្រះពុទ្ធសាសនាដ៏សម្បើមអស្ចារ្យមួយ គឺប្រាសាទបាយ័ន ដែលបានកសាងឡើងដោយព្រះបាទជ័យវរ្ម័នទី៧ ថែមទៀតផង។ ទង្វើទាំងនេះ បានធ្វើអោយមានប្រតិកម្មរបស់មហាជនកាន់តែច្រើន និងកាន់តែកំរោលឡើងនៅទូទាំងផ្ទៃប្រទេស៕
ស្ដាប់ ឬ ទាញយកសំឡេង

ប្រភព RFA

Friday, June 12, 2015