ក្រុមគ្រួសារដែលអះអាងថាជាសែរាជវង្សនរោត្ដមទាមទារដោះលែងប្ដីពីគុកព្រៃស ~ KAS4UAll

ក្រុមគ្រួសារដែលអះអាងថាជាសែរាជវង្សនរោត្ដមទាមទារដោះលែងប្ដីពីគុកព្រៃស

ក្រុមគ្រួសាររបស់ជនជាប់ចោទដែលកំពុងជាប់ឃុំនៅក្នុង ពន្ធនាគារព្រៃស ក្រោមបទចោទថា ក្លែងបន្លំសែរាជវង្សនោះ ឥឡូវនេះកំពុងស្វះស្វែងរកកិច្ចអន្តរាគមន៍ពីរដ្ឋាភិបាល និងអំពាវនាវសូមព្រះរាជទានលើកលែងទោសពីព្រះមហាក្សត្រ។ ស្ត្រីដែលជាភរិយាបានអះអាងថា តាមពិតប្ដីរបស់ខ្លួន គឺពិតជាព្រះអង្គម្ចាស់នរោត្តមរដ្ឋា ដែលជាបុត្ររបស់ព្រះមហាវីរៈក្សត្រ នរោត្តម សីហនុ ជាមួយអ្នកម្នាង បុប្ផា ភួង ពិតមែន។
បើទោះជាមានការអះអាងបែបនេះក៏ដោយចុះ ក៏អតីតទីប្រឹក្សាផ្ទាល់របស់ព្រះមហាវីរៈក្សត្រ ព្រះអង្គបានបដិសេធជុំវិញបញ្ហានេះ ហើយចាត់ទុកថា ពិរុទ្ធជនដែលកំពុងជាប់ឃុំនៅក្នុងពន្ធនាគារព្រៃសនោះ គឺពុំមែនជាព្រះរាជបុត្ររបស់ព្រះបាទសម្ដេច ព្រះនរោត្តម សីហនុ ទេ។
ការច្រានចោលសុំព្រះរាជអន្តរាគមន៍ ដើម្បីឲ្យទទួលស្គាល់ជាសែរាជវង្សពីព្រះបរមរាជវាំងនៅពេលនេះរបស់ ព្រះអង្គម្ចាស់ ស៊ីសុវត្ថិ ធម្មិកោ បានបដិសេធភ្លាមៗបន្ទាប់ពី លោកស្រី សេង ស៊ីណែត ដែលបញ្ជាក់ថា ត្រូវជាភរិយាឈ្មោះ នរោត្តម រដ្ឋា អំពាវនាវសុំឲ្យរដ្ឋាភិបាលដោះលែងប្ដីរបស់លោកស្រីចេញពីពន្ធនាគារ។ លោកស្រី សេង ស៊ីណែត រស់នៅភូមិដើមមាន សង្កាត់ដើមមាន ក្រុងតាខ្មៅ ថ្លែងថា ក្រុមគ្រួសាររបស់លោកស្រីហ៊ានប្រឈមមុខជាប់ពន្ធនាគារ ប្រសិនបើរកឃើញថា ជនជាប់ចោទឈ្មោះ នរោត្តម រដ្ឋា ក្លែងក្លាយ និងហ៊ានបន្លំថាជាសែរាជវង្សពិតមែននោះ។ លោកស្រីបន្តថា «ខ្ញុំចង់ឲ្យមន្ត្រីទាំងអស់ជួយអន្តរាគមន៍ និងដោះលែងរឿងហ្នឹង ដើម្បីឲ្យគាត់បានរួចខ្លួនពីពន្ធនាគារវិញ»។
ពិរុទ្ធជន នរោត្តម រដ្ឋា ដែលអះអាងខ្លួនថាជាសែរាជវង្សនោះ ត្រូវបានសមត្ថកិច្ចចាប់ខ្លួន និងដាក់ពន្ធនាគារព្រៃស កាលពីថ្ងៃទី២៣ ឧសភា កន្លងទៅនេះ។ មូលហេតុដែលឈានដល់ការចាប់ខ្លួននេះ បន្ទាប់ពីពិរុទ្ធជនរូបនេះព្យាយាមស្វែងរកកិច្ចអន្តរាគមន៍ ដើម្បីឲ្យបានទទួលស្គាល់ជាសាច់សាលោហិតរបស់រាជវង្ស។
ពាក់ព័ន្ធរឿងនេះ ព្រះអង្គម្ចាស់ ស៊ីសុវត្ថិ ធម្មិកោ អតីតទីប្រឹក្សាព្រះមហាវីរៈក្សត្រ ព្រះបាទសម្ដេចព្រះនរោត្តម សីហនុ ព្រះអង្គមានបន្ទូលថា ក្នុងព្រះរាជវង្សានុវង្សពុំមានឈ្មោះ នរោត្តម រដ្ឋា ទេ។ លើសពីនេះទៀត ព្រះបរមរតនកោដ្ឋ នរោត្តម សីហនុ ព្រះអង្គក៏ពុំធ្លាប់មានអ្នកម្នាងឈ្មោះ បុប្ផា ភួង ដែលអះអាងថា ជាព្រះមាតារបស់ឈ្មោះ នរោត្តម រដ្ឋា នេះថែមទៀតផង។ ព្រះអង្គម្ចាស់ ស៊ីសុវត្ថិ ធម្មិកោ មានបន្ទូលថា នេះជាការក្លែងបន្លំប៉ុណ្ណោះ។ ព្រះអង្គមានបន្ទូលថា «ជនសង្ស័យហ្នឹងបានប្រកាសថាខ្លួនឯងជា ព្រះរាជបុត្រព្រះករុណា ព្រះបរមរតនកោដ្ឋ។ សម្ដេចម៉ែក៏លោកបានមានការភ្ញាក់ផ្អើលជុំវិញរឿងហ្នឹង។ នេះ គឺជាឆ្លុះបញ្ចាំងឲ្យឃើញហើយ រឿងទាំងអស់ហ្នឹង គឺសុទ្ធតែរឿងមិនពិតទេ»។
បើទោះជាមានការបកស្រាយបែបនេះពីអតីតទីប្រឹក្សារបស់ ព្រះមហាក្សត្រក្ដី គឺមានស្ត្រីវ័យជាង ៧០ឆ្នាំម្នាក់ឈ្មោះ នាង ឡាយ ដែលអះអាងថា ធ្លាប់ធ្វើជាម្ដាយចិញ្ចឹមរបស់ នរោត្តម រដ្ឋា ក្រោយឆ្នាំ១៩៧៩ មក ឲ្យដឹងថា ពិរុទ្ធជនដែលកំពុងជាប់ឃុំនេះ គឺពុំមែនជាមនុស្សដែលក្លែងបន្លំ ដើម្បីផលប្រយោជន៍អ្វីនោះទេ។ លោកស្រី នាង ឡាយ រស់នៅសង្កាត់ស្ទឹងមានជ័យ បន្តថា ការខ្វែងគំនិតគ្នាមិនទទួលស្គាល់ថាជាព្រះរាជបុត្រផ្ទាល់របស់ ព្រះមហាវីរៈក្សត្រនេះ ព្រោះតែប្រទេសកម្ពុជា ឆ្លងកាត់ភ្លើងសង្គ្រាមជាច្រើនដំណាក់កាល ហេតុនេះបណ្ដាលឲ្យសែរាជវង្សអង្គនេះត្រូវប្រឈមនឹងបញ្ហាអត្តសញ្ញាណ មកដល់ពេលនេះ។ លោកស្រីបន្តថា «នរោត្តម រដ្ឋា ស្គាល់ដឹងថាស្គាល់ហើយ ព្រោះទទួលខ្ញុំជាម្ដាយចិញ្ចឹម»។
វិទ្យុអាស៊ីសេរី ពុំអាចស្នើសុំការបំភ្លឺបានភ្លាមៗទេជុំវិញរឿងនេះពីមន្ត្រី រដ្ឋាភិបាល ដោយអ្នកទទួលទូរស័ព្ទអះអាងថា ជាប់រវល់នៅថ្ងៃទី៧ មិថុនា។
បើទោះជាបែបនេះក្ដី ព្រះអង្គម្ចាស់ ស៊ីសុវត្ថិ ធម្មិកោ ជាសែស្រឡាយរាជវង្ស និងជាមន្ត្រីជាន់ខ្ពស់របស់គណបក្សសង្គ្រោះជាតិ ផង ព្រះអង្គនៅតែបដិសេធថា ពុំមានមហេសីព្រះនាម បុប្ផា ភួង ទេ។ ព្រះអង្គមានបន្ទូលថា ព្រះជាយារបស់ព្រះមហាវីរៈក្សត្រមានតែអ្នកម្នាង កាញ៉ូល អ្នកម្នាង ម៉ម លាវ ដែលជាជនជាតិលាវ ហើយក៏ជាព្រះមាតារបស់ព្រះរាជបុត្រី អរុណ រស្មី និងព្រះមហាក្សត្រី នរោត្តម មុនីនាថ សីហនុ ប៉ុណ្ណោះ៕

ប្រភព RFA

Sunday, June 7, 2015