ប៉ូលិសខេត្តសៀមរាបចាប់បុគ្គលិកមីក្រូហិរញ្ញវត្ថុ EBC ៧នាក់ចោទពីបទដើរបោកប្រាស់ ~ KAS4UAll

ប៉ូលិសខេត្តសៀមរាបចាប់បុគ្គលិកមីក្រូហិរញ្ញវត្ថុ EBC ៧នាក់ចោទពីបទដើរបោកប្រាស់

បុគ្គលិកបណ្ដាញទីផ្សាររបស់អង្គការមីក្រូហិរញ្ញវត្ថុ អេមផាយ ប៊ីក ខាភីថល (Empire Big Capital) ដែលប៉ូលិសនៃការិយាល័យព្រហ្មទណ្ឌកម្រិតស្រាលខេត្តសៀមរាប ចាប់ខ្លួនពីបទសង្ស័យដើរបោកប្រាស់ប្រជាពលរដ្ឋដើម្បីឲ្យយកប្រាក់ ទៅផ្ញើនៅកន្លែងពួកគេ។

ប៉ូលិសការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាល ខេត្តសៀមរាប បានចាប់ខ្លួនបុគ្គលិកផ្នែកបណ្ដាញទីផ្សាររបស់មីក្រូហិរញ្ញវត្ថុ ឈ្មោះ អេមផាយ ប៊ីក ខាភីថល (Empire Big Capital) ចំនួន ៧នាក់ កាលពីរាត្រីថ្ងៃទី៦ ខែមិថុនា កន្លងទៅ។
ស្នងការរងទទួលបន្ទុកព្រហ្មទណ្ឌនៃស្នងការដ្ឋាននគរបាលខេត្តសៀមរាប គឺលោក ថង សាគុណ។ លោកមានប្រសាសន៍កាលពីរសៀលថ្ងៃអាទិត្យ ទី៧ ខែមិថុនា ថា កម្លាំងសន្តិសុខរបស់លោកបានចាប់ខ្លួនមនុស្សស្រី ២នាក់ និងប្រុស ៥នាក់ ដែលជាបណ្ដាញទីផ្សារនៃអង្គការមីក្រូហិរញ្ញវត្ថុ អេមផាយ ប៊ីក ខាភីថល ដែលហៅកាត់ថា អ៊ី.ប៊ី.ស៊ី (EBC)។
លោក ថង សាគុណ បញ្ជាក់ថា ការចាប់ខ្លួនបុគ្គលិកបណ្ដាញរបស់អង្គការមីក្រូហិរញ្ញវត្ថុនោះ នៅពេលដែលក្រុមពួកគេកំពុងដើរធ្វើសកម្មភាពពន្យល់ឲ្យប្រជាពលរដ្ឋ យកប្រាក់ទៅផ្ញើ និងនៅកន្លែងពួកគេ ដោយសន្យាថានឹងផ្ដល់អត្រាការប្រាក់ខ្ពស់រហូត ១០%។ លោកយល់ថា សកម្មភាពនេះ គឺជាអំពើបោកប្រាស់៖ «ក្រុមហ៊ុនហ្នឹងវាដូចជាមិន ត្រឹមត្រូវតាមច្បាប់ ទី១។ ហើយទី២ ធ្វើការបោកបញ្ឆោតប្រជាពលរដ្ឋច្រើននាក់។ ករណីធ្វើនៅស្រុកពួក ស្រុកជីក្រែង ហើយមានស្ពត (Spot) មានស៊ីវី (CV) សម្រាប់ដើរធ្វើបទបង្ហាញតាមសណ្ឋាគារផង»។
ការចាប់ខ្លួនបុគ្គលិកបណ្ដាញទីផ្សារមីក្រូហិរញ្ញវត្ថុ អេមផាយ ប៊ីក ខាភីថល បានធ្វើឡើងបីថ្ងៃក្រោយអភិបាលខេត្តសៀមរាប បានចេញសេចក្តីប្រកាសមួយឲ្យប្រជាពលរដ្ឋប្រុងប្រយ័ត្ន ជុំវិញករណីបោកប្រាស់ដោយថាមានមនុស្សមួយក្រុម កំពុងដើរឃោសនាឲ្យយកប្រាក់ទៅផ្ញើនៅកន្លែងរបស់ពួកគេ ដែលជាអង្គការមិនត្រឹមត្រូវមួយ៕

ប្រភព RFA

Sunday, June 7, 2015