ស្មាតហ្វូន Huawei P8 ល្បីល្បាញពាសពេញពិភពលោកខាងថតជាប់ចលនាពន្លឺមកដល់កម្ពុជាហើយ ~ KAS4UAll

ស្មាតហ្វូន Huawei P8 ល្បីល្បាញពាសពេញពិភពលោកខាងថតជាប់ចលនាពន្លឺមកដល់កម្ពុជាហើយ

ទីបំផុត កំពូលស្មាតហ្វូន Huawei P8 ដែលល្បីខ្ទរខ្ទារ ទាំងទ្វីបអឺរ៉ុប តំបន់អារ៉ាប់ និងទ្វីបអាស៊ី លើមុខងារកាមេរ៉ាច្បាស់កម្រិត DSLR ប្រកបដោយភាពច្នៃប្រឌិតខ្ពស់ អាចថតជាប់ពន្លឺបាន និងបំពាក់ដោយបច្ចេកវិទ្យាទំនើបចុងក្រោយបំផុតជាមួយការរចនារូបរាង ដ៏ប្រណីត យកស្ទីលតាមបណ្ណាល័យ និងក្របសៀវភៅសម័យបុរាណ បានមកដល់ទីផ្សារកម្ពុជាហើយ។

បន្ទាប់ពីពិធីសម្ពោធជាសកលដ៏កក្រើកនៅទីក្រុងឡុងកាលពីខែមេសា និងពិធីសម្ពោធគួរឲ្យភ្ញាក់ផ្អើលប្រចាំតំបន់អាស៊ីអាគ្នេយ៍នៅ ទីក្រុងបាងកកកាលពីចុងខែឧសភារួចមក ក្រុមហ៊ុន Huawei បន្តនាំយកការភ្ញាក់ផ្អើល និងភាពច្នៃប្រឌិតរបស់ កំពូលស្មាតហ្វូន Huawei P8 របស់ខ្លួន មកបង្ហាញនៅកម្ពុជា ដើម្បីបង្អួតពីគុណសម្បត្តិ និងអត្ថប្រយោជន៍យ៉ាងច្រើនសម្បូរបែបទាំងផ្នែកទំនាក់ទំនងការងារ ប្រចាំថ្ងៃ និងការកម្សាន្ត ទៅកាន់អ្នកគាំទ្រ អាជីវករ និងអ្នកសារព័ត៌មាន។

ពិធីសម្ពោធ និងហ្វឹកហ្វឺនអាជីវករអំពីលក្ខណៈពិសេសរបស់ កំពូលស្មាតហ្វូនស៊េរីចុងក្រោយបំផុត Huawei P8 ត្រូវបានធ្វើឡើងនៅថ្ងៃទី ០៦ ខែមិថុនា ឆ្នាំ ២០១៥ នៅភោជនីយដ្ឋានទន្លេបាសាក់ II ដោយមានការចូលរួមពីកំពូលតារាចម្រៀង មាស សុខសោភា ជាឯកអគ្គរាជទូតសុឆន្ទៈរបស់ទូរស័ព្ទ Huawei ប្រចាំប្រទេសកម្ពុជា ពិធីករពិធីការីនី តារាចម្រៀងទើបនឹងរះថ្មី តារាបង្ហាញម៉ូតមានប្រជាប្រិយភាព អ្នកតំណាងក្រុមហ៊ុន Huawei អ្នកគាំទ្រផលិតផល Huawei អាជីវករ អ្នកថតរូបអាជីពដ៏ល្បី និងអ្នកសារព័ត៌មានជាដើម។

គួរបញ្ជាក់ថា នៅក្នុងពិធីសម្ពោធនេះ ក៏មានកម្មវិធីពិសេសជាច្រើនដូចជា ការសម្ដែង និងច្រៀងចម្រៀងល្បីៗ ពីសំណាក់កំពូលតារាចម្រៀងមាស សុខសោភា ការបង្ហាញម៉ូដែលទូរស័ព្ទ Huawei ស៊េរីថ្មីៗ ដោយតារាបង្ហាញម៉ូតល្បីៗ វគ្គបណ្តុះបណ្ដាលស្តីពីអត្ថប្រយោជន៍ និងការប្រើប្រាស់កំពូលស្មាតហ្វូន P8 ឲ្យអស់ពីលទ្ធភាព និងយុទ្ធសាស្ត្រក្នុងការលក់សម្រាប់អាជីវករ ការថតរូបចលនាពន្លឺលេងកម្សាន្តជាមួយ Huawei P8 ការឆ្លើយសំណួរយករង្វាន់ និងការទទួលទានអាហារពេលល្ងាចដ៏ឆ្ងាញ់ពិសា។

លោក ល៉ីវ ស៊ីយ៉ាង (ហៅ ជេសុន) អគ្គនាយកផ្នែកលក់ប្រចាំក្រុមហ៊ុន Huawei ប្រទេសកម្ពុជា មានប្រសាសន៍ថា៖ “តាមរបាយការណ៍ថ្មី យើងអាចបញ្ជាក់បានថា ការនាំចេញស្មាតហ្វូនក្នុងឆ្នាំ ២០១៥ ក្នុងតំបន់អាស៊ីអាគ្នេយ៍ កើនឡើង ១២០% បើធៀបទៅនឹងឆ្នាំមុន ហើយទីផ្សារ ប្រទេសកម្ពុជា គឺជាទីផ្សារដែលមានអ្នកប្រើប្រាស់ផលិតផលស៊េរីខ្ពស់ច្រើនជាងគេ មួយនៅអាស៊ីអាគ្នេយ៍។ យើងខ្ញុំរំពឹងថា នឹងលក់ Huawei ស៊េរី P8 ឲ្យបាន ១០ លានគ្រឿងទូទាំងពិភពលោក”។

កញ្ញា ខៀវ សាន់សាណា ដែលជាពិធីការនីដ៏ល្បីនៅព្រះរាជាណាចក្រកម្ពុជា បានសម្ដែងភាពរីករាយជាខ្លាំងជាមួយកាមេរ៉ាថតជាប់ចលនាពន្លឺរបស់ Huawei P8 ដែលមានមុខងារ ៤ យ៉ាងគឺ Light Trails, Silky Water, Star Track និង Light Graffiti។ ពិធីការនីដ៏ល្បី ស្អាត ក្មេងជាងវ័យ និងពូកែវោហាស័ព្ទ សាណា ដែលបានអញ្ជើញចូលរួមជាភ្ញៀវកិត្តិយសក្នុងពិធីសម្ពោធដ៏ធំប្រចាំ តំបន់នៅទីក្រុងបាងកកកាលពីថ្ងៃទី ២៨ ខែឧសភា បានឲ្យដឹង ថា “ខ្ញុំមានអារម្មណ៍ថា អស្ចារ្យមែនទែនដែលមានស្មាតហ្វូនអាចធ្វើរឿងបែបនេះបាន។ ខ្ញុំអាចថតជាប់ចលនាពន្លឺដោយគ្រាន់តែយកពិល ឬរបស់ដែលមានពន្លឺមកគូសនៅក្នុងខ្យល់ រួចថតរូបចលនានោះជាមួយមុខងារ Light Painting របស់ Huawei P8។ ខ្ញុំអាចថតសកម្មភាពក្នុងពេលរាត្រីប្រកបដោយភាពច្នៃប្រឌិតថ្មី ប្លែកពីគេ ហើយខ្ញុំគិតថាវាពិតជាអស្ចារ្យ រួមទាំងកម្រាស់ស្ដើង ស្រាល មាំដែលតួទាំងមូលស្រោបដោយលោហៈធាតុ គឺពិតជាជម្រើសក្នុងក្ដីសុបិន។

ចំណែក លោក សិទ្ធិគុណ អ្នកថតរូបអាជីពក្នុងស្រុកដ៏ល្បីម្នាក់ មានការភ្ញាក់ផ្អើលជាខ្លាំងជាមួយនឹងសមត្ថភាពកាមេរ៉ាកម្រិត DSLR របស់ Huawei P8។ លោក សិទ្ធិគុណ បានរៀបរាប់ថា៖ “គុណភាពរូបថតដែលខ្ញុំប្រើ Huawei P8 ថតនៅពេលយប់ គឺពិតជាអាចប្រៀបធៀបជាមួយរូបថតដែលថតដោយប្រើ Professional Lens Reflex Camera។ ខ្ញុំអាចប្រើ Huawei P8 បម្រើការងារថតរូបអាជីពរបស់ខ្ញុំមួយចំនួនបាន។ លើសពីនេះទៅទៀត ជាមួយ Huawei P8 ខ្ញុំអាចថតរូបច្បាស់ក្នុងទីងងឹត ដោយសារតែ Flash របស់ P8 មានពីរពណ៌គឺពណ៌ស និងពណ៌ពងមាន់ ដែលធ្វើឲ្យរូបភាពមានលក្ខណៈដូចធម្មជាតិ”។

Huawei P8 មានលក់ក្នុងទីផ្សារកម្ពុជាហើយក្នុងតម្លៃប្រហែល ៤៧៩ដុល្លារ សម្រាប់ពណ៌ Titanium Grey និង ៥៩៩ដុល្លារ សម្រាប់ពណ៌ Mystic Champagne (មាស) ចំណែក Huawei P8 Max មានតម្លៃប្រហែល ៦២៩ដុល្លារ ប៉ុន្តែ Huawei P8 Max និង Huawei P8 ពណ៌មាសនឹងចេញលក់នៅចុងខែមិថុនា ឬដើមខែកក្កដាខាងមុខ។ រាល់ការជាវ Huawei P8 ក្រុមហ៊ុន Huawei នឹងផ្ដល់ជូនការធានារយៈពេលមួយឆ្នាំ ព្រមទាំងសេវាជួសជុល VIP មានន័យថាក្រុមហ៊ុននឹងធ្វើការជួលជុសជូនអតិថិជនឲ្យហើយក្នុងរយៈ ពេលតែមួយម៉ោងប៉ុណ្ណោះ។ ចំពោះទូរសព្ទដែលទិញក្នុងរយៈពេលមិនលើសពី ៧ ថ្ងៃ ដែលមិនអាចជួសជុលបាន ក្រុមហ៊ុននឹងប្ដូរទូរស័ព្ទថ្មីជូនភ្លាម។

គួររំឭកថា ស្តុករបស់ Huawei P8 នៅប្រទេសកម្ពុជាគឺមានកំណត់ជាមួយការផ្ដល់ជូនពិសេសអស្ចារ្យទាំង តម្លៃ និងកាដូភ្លាមៗ ដូចជាស្រោម Original (តម្លៃប្រមាណ៣០ដុល្លារ) និងឧបករណ៍បំពងសំឡេងឥតខ្សែ (តម្លៃប្រមាណ ២០ដុល្លារ) ជាសរុបអតិថិជនចំណេញប្រមាណ ៥០ដុល្លារបន្ថែម។ មិនត្រឹមតែប៉ុណ្ណោះរាល់ការទិញ Huawei P8 និង ទូរស័ព្ទ Huawei ប្រភេទ 4G LTE គ្រប់ប្រភេទ អតិថិជននឹងទទួលបានកញ្ចប់ប្រូម៉ូសិនពិសេស ហ្វ្រីស៊ីម Smart និងទឹកប្រាក់ក្នុងប្រព័ន្ធ 120 USD ក្រៅប្រព័ន្ធ 5 USD និងប្រើប្រាស់អ៊ីនធឺណិតពេញមួយឆ្នាំ ឬស្មើនឹង 48,000 MB (4,000 MB ក្នុង ១ ខែ សម្រាប់រយៈពេល ១២ ខែ) ។

សម្រាប់ព័ត៌មានបន្ថែមទាក់ទងនឹងផលិតផលថ្មីៗ ប្រូម៉ូសិន និងកម្មវិធីពេសេៗរបស់ Huawei សូមចូលទៅកាន់៖ www.facebook.com/HuaweiDeviceCambodia។

ប្រភព Sabay News

Monday, June 8, 2015