ខួបទី៦៦ នៃការបាត់ទឹកដីកម្ពុជាក្រោម៖ លោក ថាច់ សេដ្ឋា អំពាវនាវឲ្យខ្មែររួមគ្នាការពារទឹកដី ~ KAS4UAll

ខួបទី៦៦ នៃការបាត់ទឹកដីកម្ពុជាក្រោម៖ លោក ថាច់ សេដ្ឋា អំពាវនាវឲ្យខ្មែររួមគ្នាការពារទឹកដី

ដូចការគ្រោងទុក សមាគមខ្មែរកម្ពុជាក្រោម បានប្រារព្ធពិធីរម្លឹកខួបលើកទី ៦៦ នៃការបាត់បង់ទឹកដីកម្ពុជាក្រោម នៅថ្ងៃទី៤ ខែមិថុនានេះ នៅទីតាំងវត្តចាស់ស្ថិតនៅសង្កាត់ជ្រោយចង្វារ ត្រើយម្ខាង ទល់មុខព្រះបរមរាជវាំង។ ថ្លែងនៅក្នុងពិធីនេះ ប្រធានសមាគមខ្មែរកម្ពុជាក្រោម លោក ថាច់ សេដ្ឋា បានផ្ញើសារឲ្យប្រជាជនខ្មែរទាំងអស់ ជាពិសេសអ្នកនយោបាយមកពីបក្សជាប់ឆ្នោតទាំងពីរ ត្រូវរួមគ្នាការពារទឹកដី។

លោក ប្រមុខសមាគមខ្មែរក្រោម ក៏បានស្នើឲ្យបក្សទាំងពីរដែលកំពុងតែអនុវត្តវប្បធម៌សន្ទនាគ្នា ត្រូវគិតគូរដោះស្រាយបញ្ហារបស់ប្រជាជនខ្មែរក្រោមផង។ លោកបញ្ជាក់យ៉ាងនេះថា៖«បើគិតពីរឿងជាតិ សូមគិតទាំងអស់ ឲ្យគិតដល់ខ្មែរក្រោមផង មិនមែនគិតតែខ្មែរណាមួយទេ។ ខ្មែរខ្សោយបានគេយកដីបាន។ បើយើងរួមគ្នា ជួបជុំគ្នា មិនមានខ្មែរក្រោម ខ្មែរលើ ខ្មែរកណ្តាល គឺខ្មែរតែមួយ យួនមិនអាចយកដីបានទេ»។

ជាការកត់សម្គាល់ពិធីរម្លឹកខួបនៃការបាត់ទឹកដីនៅថ្ងៃនេះ មិនមានវត្តមានរបស់លោកប្រមុខមេបក្សប្រឆាំងទាំងពីរ គឺលោក សម រង្ស៊ី និងលោក កឹម សុខា ចូលរួមដូចលើកមុនឡើយ។តំណាងរាស្រ្តគណបក្សសង្គ្រោះជាតិ គេសង្កេតឃើញមានវត្តមានអ្នកស្រី មូ សុខហួរ និងមន្រ្តីមួយចំនួនទៀត មានលោក មាជ សុវណ្ណរ៉ា និងព្រះអង្គម្ចាស់ ស៊ីសុវត្ថិ ធម្មិកោ ជាដើម។

ដោយឡែកមន្រ្តីគណបក្សប្រជាជនកម្ពុជា ដូចរាល់ដងដែរ គ្មានមន្រ្តីណាមួយចូលរួមក្នុងពិធីនេះតាមការអញ្ជើញរបស់សហគមន៍ខ្មែរកម្ពុជាក្រោមនោះទេ។

ក្នុងពិធីនេះ ក៏មានការយាងចូលរួមជាអធិបតីពីសំណាក់ សម្តេច ស៊ីសុវត្ថិ ពង្សនារី មុនីពង្ស ព្រះរាជតំណាងដ៏ខ្ពង់ខ្ពស់របស់ព្រះមហាក្សត្រកម្ពុជា៕

ប្រភព ThmeyThmey

Saturday, June 6, 2015